Японы гүнж Мако жирийн эртэй суухын тулд ХААНЫ УДМААСАА татгалзлаа
Японы хааны удмын гишүүн, Мако гүнж жирийн иргэнтэй гэрлэн, өөрийн хааны удмын байр сууриас татгалзахаар болсон тухай BBC мэдээлэв.
Эзэн хаан Акихитогийн 25 настай ууган зээ охин нь хуулийн фирмийн ажилтан, өөртэй нас чацуу Кэй Комуротой хамт сурч байхдаа танилцан, улмаар сүй тавьжээ. Японы эзэн хааны хуулинд хааны удмын байр сууриа бүрмөсөн орхисны дараа л энгийн иргэнтэй гэрлэх боломжтой болдог байна.
Гүнж Мако болон Кэй Комуро нар 2012 онд Токиогийн Олон улсын Христосын их сургуульд суралцаж байхдаа танилцаж байжээ. Тэрээр нэгэн цагт Японы аялал жуулчлалыг дэмжих “Далайн хунтайж” кампанит ажилд хамт оролцож байсан аж.
Тэдний сүй тавих төлөвлөгөөны талаар асуухад Комуро “Одоо миний тайлбар хийх цаг биш, гэхдээ би зөв цагт нь ярихыг хүсч байна” гэжээ.
Японы Эзэн хаан Акихито нас өндөр болсон шалтгаанаар хаан ширээнээсээ буух хүсэлтэйгээ өнгөрсөн наймдугаар сард илэрхийлж байсан. Улмаар тус улс одоогийн байдлаар түүнд огцрох боломжийг олгох хууль эрх зүйн өөрчлөлтийг хэлэлцэж байна.
Өөрийн хүслээр хаан ширээнээсээ татгалзах тохиолдол сүүлийн хоёр зууны турш гарч байгаагүй юм. Хэлэлцэж буй хуулийн дагуу хаан ширээг зөвхөн эрэгтэй хүн л залгамжлах боломжтой. “Хааны ширээг ганхуулахгүй, цаашид тогтвортой байлгах ёстой гэсэн бидний үзэл бодол өөрчлөгдөөгүй” хэмээн Засгийн газрын ерөнхий нарийн бичгийн дарга Ёошихидэ Суга Ройтерс мэдээллийн агентлагт өгсөн яриандаа онцолсон байна.
Хаан ширээг залгамжлах боломжтой дөрвөн өв залгамжлагч бий. Тэдгээр нь Акихотогийн хүү, хунтайж Нарухито болон хунтайж Фумихито, хунтайж Хисахито, (Фумихитогийн хүү) бас эзэн хааны дүү, хунтайж Масахито нар юм.