Өрхүүд холбоонд зарцуулдаг зардлаа бууруулжээ
Энэ оны нэгдүгээр улирлын байдлаар өрхийн сарын дундаж мөнгөн орлого 893.3 мянган төгрөг болж, өмнөх оны мөн үеэс 43.9 мянгаар өсжээ. Өрхийн сарын дундаж мөнгөн орлого өсөхөд цалин хөлсний орлого 27.6 мянга, тэтгэвэр, тэтгэмжийн орлого 22.8 мянган төгрөгөөр өссөн нь голчилж нөлөөлсөн байна. Мөн хөдөө аж ахуйн үйлдвэрлэлийн орлого 5.6 мянган төгрөгөөр өссөн байна.
Тэгвэл өрхийн сарын дундаж мөнгөн зарлага энэ оны нэгдүгээр улиралд 940 мянган төгрөг болжээ. Энэ нь өмнөх оны мөн үеэс 25 мянган төгрөгөөр буурсан байгааг харуулж байна. Өрхийн сарын дундаж мөнгөн зарлага буурахад хүнсний бус бараа, үйлчилгээний зарлага 34.1 мянган төгрөгөөр буурсан нь голчилж нөлөөлсөн байна. Нарийвчлан харвал өрхүүд холбоонд зарцуулдаг зардлаа танажээ.