1 мин

Хятад-Европыг холбосон төмөр замын ачаа эргэлтийг Монголоор дамжуулбал өртөг багатай

ОХУ-ын төрийн өмчит РЖД компани Казахстанаас Монголыг илүү үзэж буйгаа хэлжээ.

Э.Хулан 2017.05.22 41 23 9

ОХУ-ын төрийн өмчит РЖД компани Европ-Хятадыг холбосон төмөр замын шилжүүлэн ачих ажилд Казахстанаас Монголыг илүү үзэж буйгаа хэлсэн байна. Учир нь Монголоор дамжуулж транзит тээвэр хийснээр ачаа илгээгчийн өртөг 15-20 хувиар буурах тооцоо гарчээ. 

РЖД компани Монголоор дамжуулан Хятад-Европыг холбосон шинэ үйлчилгээ нэвтрүүлэх боломжтой гэнэ. Хятадаас Европ руу бараа нийлүүлэх жижиг, дунд бизнес олширч, эрэлт нэмэгдэж байгаа учраас энэ шийдлийг санал болгосон байна. Жижиг, дунд ч гэлтгүй онлайнаар худалдаа хийдэг Хятадын могул JD.com зэрэг компанийн Европыг зорих бараа бүтээгдэхүүн нэмэгдэж байгаа юм. Шинэ чиглэлийн зам нь Хятадын зүүн хэсгийн мужуудыг ОХУ-тай холбоно гэж РЖД-гийн албаны хүн хэлсэн юм. Зүүн хэсэгт бидний сайн мэдэх  Шанхай хот бий. 

Монголыг Казахстантай харьцуулахад Хятад-Европыг холбосон транзит тээвэр хийвэл өртөг багаас гадна хугацаа хожих боломжтой юм байна. Казахстан, ОХУ-аар дамжиж Хятадаас Европыг чиглэсэн транзит тээвэр хийвэл 20-21 хоног болох гэнэ. Харин Монголоор дамжиж, транзит тээвэр хийвэл 14 хоног болох тооцоог РЖД танилцуулсан байна. 

Бараа илгээгчдийн хувьд цаг хожихоос гадна өртөг ч багасна. Тухайлбал, Казахстаны төмөр замыг ашиглаж 20-25 контайнер ачаа зөөхөд 70 мянган ам.доллар төлдөг бол Монголоор дамжуулахад үүнээс 30-50 хувиар бага үнээр ачаагаа зөөх аж.

РЖД болон ОХУ-ын ачаа тээврийн “TransContainer” компани Монголтой хиллэдэг Наушики боомтоор дамжуулж эл үйлчилгээг хэдийнэ нэвтрүүлсэн байгаа гэнэ. Ирэх саруудад Монголтой хиллэдэг бусад боомтыг ч ашиглаж эхлэх төлөвтэй байна. 

Э.Хулан 2017.05.22