Английн шигшээ баг цэргүүдэд “дэглүүлэв”
Их Британийн Хатан хааны тэнгисийн усан цэргийн бэлтгэлийн баазад очиж, нэг хоног цэргийн бэлтгэл хийжээ.
Английн хөлбөмбөгийн шигшээ баг Шотланд, Францын багтай хийх нөхөрсөг тоглолтондоо шаргуу бэлтгэж байна. Хөлбөмбөгийг зохион бүтээж, хүн төрөлхтөнд бэлэглэсэн ч өөрсдөө дэлхийн дэвжээнд амжилт тааруухан байгаа тэд жирийн биш бэлтгэл хийж байж, дэлхийг дахин эзлэнэ гэж бодож байна. Дасгалжуулагч Гарет Саутгейт багаа аван, Их Британийн Хатан хааны тэнгисийн усан цэргийн бэлтгэлийн баазад очиж, нэг хоног цэргийн бэлтгэл хийжээ.
“Бид залуусаа хүнд хэцүү нөхцөлд биеэ яаж авч явах, сандарч тэвдэлгүй үйлдэл хийдэг болгох зорилго тавьсан. Хүний бие махбодийн боломжийг бараг давсан гэхээр дасгал хийлгэлээ. Цэрэг дайчдын энэ дасгалыг хийснээр багаар ажиллах чадвар сайжирч, баг хамт олныхоо төлөө ажилладаг чадвар суусан. Учир нь жинхэнэ дайнд бүгд нэг зорилгын төлөө хамт тэмцэж байж л амьд үлдэнэ. Ганцаараа ялалт байгуулна гэж байхгүй” гэж Гарет ярьсан юм.