823 сая хэрэглэгч Цагаан сарын бэлгээ “Wechat”-аар шилжүүлжээ
“Wechat”-ын нийт хэрэглэгчдийн 80 гаруй хувь нь Цагаан сарын бэлгээ дижитал хэлбэрээр шилжүүлжээ
Өмнөд хөршийн Цагаан сар энэ жил манайхтай давхцаж, өнгөрсөн 7 хоногт тохиолоо. Харилцаа холбоо, худалдан авалт, гүйлгээ гээд бүхнийг “Wechat”-аар хийдэг хятадууд энэ жил дахин шинэ дээд амжилт тогтоожээ. Тодруулбал, гахай жил “Wechat”-ын нийт хэрэглэгчдийн 80 гаруй хувь буюу 823 сая хэрэглэгч Цагаан сарын бэлгээ дижитал хэлбэрээр шилжүүлжээ. Энэ нь өнгөрсөн жилтэй харьцуулахад 7 хувиар өссөн үзүүлэлт аж. (Хятадын 1.4 тэрбум хүн амын 1 тэрбум нь “Wechat”-ыг идэвхтэй ашигладаг гэсэн тооцоо бий).
Хятадад Цагаан сарын баяраар улаан дугтуйтай мөнгө бэлэглэх уламжлал өргөн дэлгэрсэн. Харин 2014 онд “Wechat” дугтуйтай мөнгө илгээх үйлчилгээг танилцуулснаас хойш дижитал хэлбэрээр бэлгээ солилцох нь эрс нэмэгдсэн байна.
“Wechat”-ыг эзэмшигч Тенсент компанийн мэдээлснээр 1990 оноос хойш төрсөн хүмүүс дижитал хэлбэрээр улаан дугтуй солилцох үйлчилгээг хамгийн идэвхтэй ашиглаж байна гэжээ. Үүнээс гадна Бээжин, Гуанжоу, Чунцин гэсэн гурван хот дижитал бэлэг солилцсон тоогоороо дээд амжилт тогтоожээ.
Түүнчлэн энэ жилийн Цагаан сараар онлайн худалдааны Алибаба компани Alipay гар утасны төлбөр тооцооны хэрэгслээрээ тоглоом нэвтрүүлсэн нь 330 сая хэрэглэгчийг татаж чадсан байна. Энэ нь “Wechat”-ын улаан дугтуй бэлэглэх үйлчилгээтэй төстэй боловч тоглоом хэлбэрээр явагддагаараа онцлог гэнэ. Уг үйлчилгээг ашиглан 500 сая юань (74 сая доллар)-ийг дижитал бэлэг болгон солилцжээ.