1 мин

Хепатитийн В, С вирусийн илрүүлэг шинжилгээнд 40-65 настай иргэдийг хамруулна

Шинжилгээ маргааш эхэлнэ.

Э.Намуун 2017.06.14 38 25 17

Нийслэлд оршин сууж байгаа 40-65 насны иргэдийг хепатитийн В, С вирусийн илрүүлэг шинжилгээнд хамруулах ажил  энэ сарын 15-ны өдөр буюу маргааш нийслэлийн 9 дүүрэгт  нэгэн зэрэг эхэлнэ. Уг шинжилгээг энэ оны есдүгээр сарын 25-ны өдөр хүртэл авна. Иймд хепатитийн В, С вирусийн илрүүлэг шинжилгээнд хамрагдах хүсэлтэй 40-65 насны иргэд эрүүл мэндийн даатгалын 2016, 2017 оны шимтгэлийг бүрэн төлсөн байх шаардлагатайг анхаарна уу.

Монгол Улсын Засгийн газрын 2017 оны 112 дугаар тогтоолоор “Элэг бүтэн Монгол” үндэсний хөтөлбөр батлагдсан. Тус хөтөлбөрийн хүрээнд Хөдөлмөр, нийгмийн хамгааллын болон Эрүүл мэндийн сайдын 2017 оны тавдугаар  сарын 12-ны өдрийн хамтарсан тушаал гарч даатгуулагчийг хепатитийн В, С вирусийн илрүүлэг шинжилгээнд хамруулах, даатгалын сангаас зардлын төлбөрийг санхүүжүүлэх журам батлагдан гарсан. Энэхүү шийдвэрийг үндэслэн нийслэлийн Эрүүл  мэндийн газраас Улаанбаатар хотод илрүүлэг шинжилгээг хийх эмч, мэргэжилтнийг бэлтгэж сургах, тоног төхөөрөмж, багаж хэрэгсэл, шинжилгээний материалын бэлэн байдлыг хангах, өрхийн эрүүл мэндийн төв дээр хороо, хэсгээр нь эмх, замбараатай, хүлээгдэл чирэгдэлгүй шинжилгээнд хамруулах хуваарийг боловсруулах зэрэг олон төрлийн бэлтгэл ажлыг зохион байгууллаа гэж нийслэлийн Эрүүл мэндийн газраас мэдээллээ.

Э.Намуун 2017.06.14