2 мин

Ерөнхийлөгчийн сонгууль: С.Ганбаатарын “ГАЙХАМШИГТАЙ” 5 статистик

Ж.Тэгшжаргал 2017.06.27

2017 оны Монгол Улсын Ерөнхийлөгчийн сонгууль маш сонирхолтой болж, түүхэндээ анх удаагаа дахин санал хураалт болохоор болж байна. Энэ тааварлашгүй үр дүн гарахад хүргэсэн хамгийн гол хүн бол МАХН-аас нэр дэвшигч С.Ганбаатар.

Гуравдагч хүчнээс хамгийн амжилттай сонгуульд оролцсон хүн

Сонгууль дүн гарах эцсийн мөч хүртэл хоёрдугаарт бичигдэж явсан тэрбээр Монгол Улсын Ерөнхийлөгчийн сонгуульд гуравдагч хүчнээс хамгийн өндөр дүн үзүүлсэн хүн боллоо. Тэр саналаа өгсөн нийт сонгогчдын 30.61%-ийн саналыг авсан. 2005 оны Ерөнхийлөгчийн сонгуульд БНН-аас нэр дэвшигч Б.Жаргалсайхан 13.8%-ийн санал авсан нь өмнөх амжилтын эзэн байсан билээ.

МАХН-аас нэр дэвшигчийн том амжилт

МАН-аас өрх тусгаарласнаас хойш МАХН хоёр дахь удаагаа Ерөнхийлөгчийн сонгуульд оролцож байна. 2013 онд нэр дэвшигч Н.Удвал ердөө 6.5%-ийн санал авч байсан юм.

Хамгийн олон тойрогт ялсан хүн

Энэ удаагийн сонгуульд АН-аас нэр дэвшсэн Х.Баттулга нийт сонгогчдын хамгийн их буюу 38.64%-ийн санал авсан. Тэр нийслэлийн 7 дүүрэг, нэг аймаг (Баянхонгор)-т ялсан бол С.Ганбаатар 10 аймаг, нэг дүүрэг, М.Энхболд мөн 10 аймаг 1 дүүрэгт саналын тоогоор тэргүүлсэн.

Анхны дахин санал хураалт

Монгол Улсын Ерөнхийлөгчийн сонгуулийн түүхэнд анх удаагаа дахин санал хураалт болохоор болсон нь С.Ганбаатарын амжилттай шууд холбоотой гэж үзэж болно.

Төсөөлөөгүй амжилт

Сонгуулийн өмнө болсон “Сант Марал”-ын судалгаагаар “Улс орондоо нэр хүндтэй хүмүүсээс хэнийг нь та энэ сонгуулиар ерөнхийлөгч болоосой гэж хүсдэг вэ?” гэсэн санал асуулгад М.Энхболд улсын хэмжээнд 4-т, Х.Баттулга 8-д нэрлэгдсэн бол С.Ганбаатар эхний 10-т багтаж чадаагүй байсан юм. Сонирхуулахад, уг санал асуулгыг Б.Бат-Эрдэнэ тэргүүлж, Н.Энхбаярт хоёрт орсон байсан.