Фабио Базиле: Олимп, дэлхийн аварга болсон анхны итали жүдоч болно
Олимпийн аварга хүн байж, ДАШТ-д огт оролцож байгаагүй.
“Рио 2016” олимпийн аварга Фабио Базиле олимпийн дараа од болон хувирсан. Тэр сэтгүүлийн нүүрэн дээр заларч, телевизийн шоунд оролцон, бүжгийн тэмцээнд түрүүлж, урлагийн тавцанд чамгүй амжилт олсон. Гэвч тэр жүдодоо эргэн ирэхээр шийджээ. Хоёр сар жүдогийн эх оронд бэлтгэл хийсэн Фабио Унгарын нийслэлд болох ДАШТ-д дэлхийг дахин шуугиулахаар бэлтгэж байгаагаа “Ippon” сэтгүүлийн сурвалжлагчид ярьжээ.
- ДАШТ эхлэхэд хоёр сар үлдлээ. Чи бүгдийг ялахад бэлэн байна уу, эсвэл дутуу зүйл байна уу?
- Би юунд ч хэзээд бэлэн байдаг гэдгээ байнга хэлдэг байсан. Би 2014 онд ч бэлэн байсан. Харин одоо 2017 он болж байна. Анх удаагаа ДАШТ-д оролцоно гэхээр инээдтэй ч юм шиг. Олимпийн аварга хүн байж, ДАШТ-д огт оролцож байгаагүй. Японд хоёр сар бэлтгэл хийгээд би шинэ өндөр түвшинд гарснаа мэдэрч байна.
- “Рио 2016” наадмын финалд Ан Баулд хийсэн мэхээ санаж явдаг байх. Гэхдээ дараа нь та Токиогийн Их Дуулгын эхний тойрогт Исодад эхний тойрогт л ялагдсан. Будапештэд аль Базилег нь бид харах вэ?
- Тэр өдөр нь л харах болно доо. Одоо би энэ талаар бодохгүй байгаа. Тайван сайхан амьдарч, бэлтгэлээ хийж байна. ДАШТ бол миний хувьд бусад тэмцээнтэй л адилхан тэмцээн. Өөрийгөө өөрчлөх, барилдаанаа солих бодолгүй байна. Цаашид ирэх ялалт болгоноо дэмжиж тусалдаг хүмүүстээ зориулсан хэвээр байх болно.
- Таны фэний тоо маш их болсон болохоор их олон хүнд зориулах нь дээ.
- Тиймээ, энэ бол сайн хэрэг. Гэхдээ би намайг амжилт олж, аварга болохоос өмнө итгэж, туслаж байсан хүмүүсийг илүү боддог. Ялангуяа Италийн шигшээ багийн ерөнхий менежер Мүраками. Мүраками бол надад хамгийн анх итгэл хайрласан хүн. Одоо би ганцаарчилсан бэлтгэл хийж байгаа ч тэр надад техникийн талын зөвлөгөө өгдөг. Түүнд маш их талархаж явдаг.
- ДАШТ-ий медалийн хувь заяа сугалаанаас их хамаардаг гэдэг. Харин танд хэнтэй таарах нь хамаагүй юу?
- Яг шударгаар хариулахад хүчтэй, сайн өрсөлдөгч нартайгаа шууд таарвал баярлах болно. Хэцүү байх тусмаа сонирхолтой байдаг.
- Тэгвэл эхний тойрогт хэнтэй таармаар байна?
- Хэн ч байсан яахав. Би хэн нэгнийг онцлохгүй.
- Асуултыг өөр янзаар тавья. Таны жинд хамгийн хүчтэй бөх хэн бэ?
- Абе, Маргвелашвили, Ан, Зантарая нар хүчтэй.
- Ярилцлага өгсөнд баярлалаа.
- Баярлалаа. Одоо би 10 хоног амарна. Дараа нь Туринд дасгалжуулагчтайгаа бэлтгэлээ үргэлжлүүлж, ДАШТ-д бэлтгэх графикаа гаргана. Үнэнийг хэлэхэд би ямар нэг юмыг урьдчилан төлөвлөх дургүй.