ШУУРХАЙ: Түймэртэй тэмцэхэд иргэд хэрхэн тусалж байна вэ?


  |     2017-07-16 10:26   |     1315
  2017-07-16 10:26   |     1315

Түймрийг унтраахад туслах, хувь нэмрээ оруулах хүсэлтэй иргэд цахим орчинд нэгдэж, “Гал сөнөөгчдөд туслах групп” нэртэй бүлгэмийг Фэйсбүүкт үүсгэсэн. Үүнд одоогоор 56915 хүн нэгджээ. Хандивын дансанд нийт 30 сая 395516 төгрөг цугласан бөгөөд хэрхэн зарцуулахыг бүлгэмийн гишүүд зөвлөлдөж байна.



Түүнчлэн хоол хувцас, эд материалын тусламж, хандив тасралтгүй ирсээр байгаа аж. Үүнээс гадна Онцгой байдлын ерөнхий газраас иргэдийн хүсэлтийн дагуу албан ёсны хандивын наас нээжээ. Бүлгэмийн гишүүд хандивын мөнгийг албан ёсны данс руу нэгтгэж, түймэр унтраах зориулалтын онгоц авах, түрээслэх ажилд нэмэр болох санал гаргаж байна.

Өчигдөр буюу долдугаар сарын 15-нд түймрийн голомтод очиж туслах хүсэлтэй иргэд төв талбайд цугласан юм. Онцгой байдлын ерөнхий газрын мэдээлснээр, 100 гаруй иргэн цуглаж, Батсүмбэр рүү явжээ. Гэхдээ энгийн иргэд түймрийн голомт руу орохгүй бөгөөд онцгой байдлын албан хаагчдын хоол ундыг бэлтгэх, хандив тусламжийг хүргэх, ус зөөх зэрэг үйлсэд зүтгэж буй юм.



Түймэртэй тэмцэж буй албан хаагчдад туслаж буй иргэд УС хангалттай байгааг дурдаад харин ОЙМС, ГУТАЛ, УС ШҮРШИГЧ, УТААНЫ МАСК, БЭЭЛИЙ, МАЙХАН, ДУХНЫ ГЭРЭЛ, ХООЛ ХҮНС хэрэгтэйг мэдээлж байна.

Монгол Улсын Шадар сайдын зөвлөх Л.Саянаа, ОБЕГ-ын тэргүүн дэд бөгөөд штабын дарга, бригадын генерал Г.Ариунбуян, ОБЕГ-ын ГТТГ-ын дарга, онцгой байдлын хурандаа С.Залуухүү  нар тус бүлгэмийн төлөөлөгчид болон туслах хүсэлтэй иргэдийн төлөөллийг хүлээн авч уулзах үеэрээ, “Гал түймэр унтраахаар иргэд сайн дураар явахыг хүлээн зөвшөөрөх боломжгүй. Зайлшгүй явах тохиолдолд мэргэжлийн нэг өдрийн сургалтад хамрагдаж, эрүүл мэндээр тэнцэх эсэхээ заавал шалгуулах, мэргэжлийн хүмүүсийн зааварчилгааны дагуу ажиллах ёстой” хэмээн анхаарууллаа.



“Төр иргэнээ хамгаалах ёстой. Тийм учраас иргэдийн энэ эх орноо гэсэн сайхан санаачлагыг талархан хүлээж авч байгаа хэдий ч түймрийн нөхцөл байдал тогтворгүй байгаа ийм нөхцөлд мэргэжлийн бус хүмүүсийг ойн түймэрт явуулж болохгүй. Иргэдийнхээ амь нас, аюулгүй байдлыг хамгаалах ёстой” гэсэн байр суурийг Онцгой байдлын асуудал эрхэлсэн байгууллагаас баримталж байгаа юм.

Улсын хэмжээнд 21 түймэр асч байгаагаас тав нь хүн хүч хүрэх боломж хомс ой хөвчид дэгджээ. Түймрийн голомтыг орон нутгийн байрлалаар үзвэл Сэлэнгэ аймгийн Ерөө, Мандал, Хүдэр, мөн Булган аймгийн Сэлэнгэ, Хутаг-Өндөр сумаас гадна Төв аймгийн Батсүмбэр суманд хамгийн олон буюу таван түймэр асч байна. Түймрийн 16 голомтод ОБЕГ-ын болон орон нутгийн нийт 700 гаруй албан хаагч, 30 машин техник ажиллаж байна.


 



Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.

ХАКҮХО аваргын түүхэн амжилтаар ОМОГШСОН монголчуудын 10 ПОСТ

Тэрээр озэки Такаяасуг давснаар 1048 дахь даваагаа авлаа.

  2017-07-21 19:06

“Зарлиг эрдэнийн монгол соёл” нэртэй их хөлгөнийн үзэсгэлэн дэлгэгдлээ

Ганжуур, Данжуурын судрууд нь 14 дүгээр зуунаас эхтэй, монголчуудын бичиг соёлын үнэт өв юм.

  2017-07-21 18:56

Game of Thrones: Кит Харингтон, Роуз Лесли нар сүй тавьсан уу?

Тэдний тухай сошиал даяар шуугьж байна.

  2017-07-21 18:55