Онцгой байдлын ерөнхий газрын дансанд 580 гаруй сая төгрөгийн хандив цугларчээ
580.461.636 төгрөгийн мөнгөн хандивлажээ.
Түймрийн голомтод ажиллаж байгаа гал сөнөөгчид болон Онцгой байдлын албанд дэмжлэг үзүүлэх зорилгоор иргэд, аж ахуйн нэгж байгуулагуудаас ирүүлж буй хандив тусламж тасралтгүй үргэлжилсээр байна.
Энэ сарын 20-ны 18:00 цагийн байдлаар Онцгой байдлын ерөнхий газрын хандивын дансанд 595 төрийн болон төрийн бус байгууллага, аж ахуйн нэгж, иргэд нийт 580.461.636 төгрөгийн мөнгөн хандивлажээ.
Үүнээс гадна аж ахуйн нэгж, байгууллагууд, иргэдээс цэвэр ус, талх, ундаа, бэлэн хоол тэргүүтэй хүнсний бүтээгдэхүүн, гутал, бээлий, цамц, хүрэм, өмд, малгай гэх мэт хувцас хэрэглэл, усны сав, галын гөвүүр, галын хор, амны хаалт, үлээгүүр зэрэг багаж, тоног төхөөрөмж, явуулын эмийн сан гэх зэргээр боломжит бүхий л зүйлийн хандив, тусламжийг өгсөн юм.
Эдгээр тусламжаар ирүүлсэн хүнс, хувцас, тоног төхөөрөмж, багаж хэрэгслийг Төв аймгийн Батсүмбэр, Эрдэнэ сум, Булган аймгийн Гурванбулаг, Сэлэнгэ сум болон Сэлэнгэ аймгийн Ерөө, Мандал, Хүдэр сумдын нутагт түймрийн голомтод ажиллаж байгаа алба хаагч, иргэдэд цаг алдалгүй хүргүүлж ажиллалаа гэж Онцгой байдлын ерөнхий газраас мэдээллээ.