мин

Горхи-Тэрэлжийн цогцолборт газар ариун цэврийн цэвэрлэх байгууламжтай боллоо

Тус газарт жилдээ гадаадын 20 мянга, дотоодын 200 мянга орчим аялагч ирдэг байна.

Э.Намуун 2017.07.21 24 23 2

4

Горхи-Тэрэлжийн байгалийн цогцолборт газарт жилдээ гадаадын 20 мянга, дотоодын 200 мянга орчим аялагч, жуулчид аялдаг бөгөөд нийслэлд хамгийн ойрхон, дэд бүтэц сайн хөгжсөн байгалийн үзэсгэлэнт газрын нэг юм. Тэгвэл уг байгалийн цогцолбор газарт жуулчдад зориулж НҮБ-ын Байгаль орчны байгууллагын Олон улсын хүрээлэн буй орчны технологийн төв, Азийн технологийн институт, Ази, Номхон далайн бүсийн нөөцийн төвийн санхүүжилтээр БОАЖЯ хамтран ариун цэврийн цэвэрлэх байгууламжийг өнөөдөр ашиглалтад орууллаа.

Усыг 98.6 цэвэршүүлдэг уг ариун цэврийн байгууламж нь өдөрт 3 тонн усыг цэвэршүүлэх хүчин чадалтай юм байна. Мөн цэвэршүүлсэн усныхаа 40 хувийг саарал ус болгон дахин ашиглах бөгөөд 40 хэмийн хүйтэнд ажиллах чадвартай аж. НҮБ-ын дээрх байгууллагуудтай 2015 оноос хойш хэрэгжүүлж буй ажлын хүрээнд уг ариун цэврийн байгууламжийг бий болгосон бөгөөд “Sunny Service” компани уг ажлыг хийж гүйцэтгэжээ.

Уг байгууламжийг ашиглалтад оруулснаар байгалийн цогцолбор газарт стандартад бүрэн нийцсэн ариун цэврийн байгууламж байгуулах ажлын эхлэл болж байгаа хэмээн албаныхан онцолж байна. Мөн үүнтэй холбогдуулан аялал жуулчлалын бүс, тэр дундаа байгалийн цогцолборт газарт үйл ажиллагаа явуулж буй аж ахуйн нэгжүүдэд ч мөн адил цэвэрлэх байгууламж бүхий ариун цэврийн байгууламж бий болгох албан ёсны шаардлага тавьж ажиллахаар болов.    

Э.Намуун 2017.07.21

4