Улаанбаатарын автобусанд л тохиолддог 12 “Орк” явдал
Автобусанд хүмүүсийн гаргадаг “хүн биш” үйлдлүүд мөн ч олон байна даа...
Нийтийн тээврийн хэрэгслээр зорчино гэдэг нэг бус нэлээн хэдэн хүний эрх, ашигт хамаатай асуудал. Гэхдээ хүн бүхэн дор бүрнээ хичээгээд, дараах үйлдлүүдийг хийхгүй байхад л болоод явчихна. “UB Comedy Club”-ийн бичсэн “Автобусанд аятайхан, хүн шиг явах дүрмийн төсөл” гэх постын ачаар олон зуун залуус дотроо “эмзэглэж” явдаг сэдвүүдээ дэлгэж байна. Тэрхүү пост болон хүмүүсийн бичсэн сэтгэгдэл, саналаас сэдэвлэн энэхүү нийтлэлийг бэлтгэлээ.
Автобусанд хүмүүсийн гаргадаг “хүн биш” үйлдлүүд:
1. Автобусанд зайтай байхад л эмэгтэй хүний ард учир зүггүй наалдаж зогсох.
2. Олон хүний дунд байгаагаа үл умартан утсаар, эсвэл хамт яваа хүндээ хамаг амьдралаа дэлгэн чангаар орилох.
3. Хүмүүсийн зөрдөг, зогсдог газар хөлөөрөө дэгээдэх гэж байгаа юм шиг суух.
4. Суудлын бүрээс, цонхыг АЛБААР заваартуулж, хорлон сүйтгэх.
5. “Картаа нэг нэгээр нь дарна уу” эсвэл “Үлдэгдэл хүрэлцэхгүй байна” гээд байхад л сонсоогүй юм шиг өөртөө итгэлтэйгээр цааш алхах.
6. Хүн ихтэй байхад хүртэл цовдлуулсан ЕСҮС барилтаар 2 бариулаас тас атгаж явах.
7. Буухгүй байж хаалган дээр зам хааж зогсох.
8. Хамгийн арын суудал дээр яг тавуулаа сайхан сууж байхад хэн нэгэн ирээд “Жоохон шахчих” гээд чихэж суух.
9. Хажууд сууж буй хүнийхээ фэйсбүүк, мессежийг унших.
10. Сууж байгаа хүний өвөр дээр цүнх, тортой юмаа тавих.
11. Хажууд нь гэмгүй зогсож байхад хулгайч руу харж байгаа юм шиг хардаж, сэрдэх.
12. Хүнээр дүүрсэн автобусны жолооч зорчигчдыг “чигжих” гэж гэнэт тооромслох.