мин

Ерөнхийлөгч Х.Баттулгын гадаад айлчлал ЭНЭТХЭГЭЭС эхлэх үү?

Ж.Тэгшжаргал 2017.07.26 45 44 10

9

Энэтхэг Монгол Улсын шинэ Ерөнхийлөгч Х.Баттулгыг эх орондоо айлчлахыг албан ёсоор урьсан тухай "India Times" мэдээлэв. Хятад, Энэтхэг улсын харилцаа мухардалд орсон энэ үед Хятадыг нээлттэйгээр шүүмжилдэг, тус улсаас эдийн засгийн хараат болохыг эсэргүүцдэг төрийн тэргүүнийг урьсан нь анхаарал татаж байгаа тухай бичжээ. 

2015 онд Монголд айлчилж байсан Энэтхэгийн Ерөнхий сайд Нарендра Моди Монголын Ерөнхийлөгчийн сонгуулийн дүн албан ёсоор тодорхой болсны дараахан Ерөнхийлөгч Х.Баттулгад урилга илгээжээ. Мөн Энэтхэгийн Ерөнхийлөгч Пранаб Мукержи захидал явуулсан байна. 

Өнгөрсөн долоо хоногт Бүгд Найрамдах Энэтхэг Улсаас Монгол Улсад суугаа Онц бөгөөд Бүрэн эрхт Элчин сайд Суреш Бабу Монгол Улсын Ерөнхийлөгч Х.Баттулгад бараалхсан. Энэ үеэр Монгол Улсын өмнөх Ерөнхийлөгчийн 8 жилийн өмнө Энэтхэг Улсад хийсэн анхны айлчлалын үеэр Энэтхэгийн талаас амласан 20 сая ам.долларын зээлийн асуудал ихээхэн удаашралтай байгаа тул энэхүү хөрөнгийг Монгол Улсад мэдээллийн технологийн салбарыг хөгжүүлэх, боловсон хүчин бэлтгэхэд чиглүүлэх нь онцгой ач холбогдолтой тухай яриа болсон. Мөн БНЭУ-ын алдартай их сургууль болох Энэтхэгийн тэргүүлэх зэргийн Indian Institute of Technology сургуулийн салбарыг Монгол Улсад  байгуулж өгөх саналыг Энэтхэгийн Ерөнхий сайд Нарендра Модид дамжуулж өгөхийг Элчин сайдаас хүсч, уг төслийг Монгол Улсын Ерөнхийлөгчийн хувьд ивээлдээ авч хэрэгжүүлэхэд бэлэн гэдгээ илэрхийлж байсан билээ. 

Ж.Тэгшжаргал 2017.07.26

9