Флойд Мейведер, Конор МакГрегор нар жиндээ орлоо
Флойдын орлого 400 сая доллар болон нэмэгдэх магадлалтай бол Конор 100 сая авах боломжтой
Америкийн мэргэжлийн боксчин Флойд Мейведер Ирландын холимог тулаанч Конор МакГрегор нарын дэлхий дахины сонирхлыг татсан тулаан манай цагаар маргааш өглөө болох гэж байна. Тоглолтын тов зарлагдсан зургаадугаар сараас эхлэн бөмбөрцөг даяараа энэ тулааныг хүлээсэн билээ. Тулаан боксын дүрмээр явагдах ч боксын ямар нэг холбооны далбаан дор болохгүй. 69.85 кг хүртэлх жинд, 12 үе болохоор тогтсон. Мөн тэд албан ёсоор сэргээшийн шалгалтад орно.
Флойд Мейведер 2015 оны есдүгээр сард Андре Бертог ялснаасаа хойш рингэнд гараагүй байгаа. Харин МакГрегор UFC холбооны аварга.
Мэйведер мэргэжлийн бокст 49 тулалдаж бүгдэд нь ялсан (26 удаа хүнд цохилтоор) бол Конор холимог тулаанд 23 тулалдаж, 20 ялснаас 17-г нь хүнд цохилтоор дуусгажээ.
Өнөөдөр тамирчид Лас-Вегаст жингээ үзүүлж, нүүр тулан дахин уулзлаа. Конор зогсоо зайгүй юм ярин, хашгарч байсан ч харин Флойд хариуг нь барьсангүй. Дараа тэд рингэн дээр нүүр тулгарах болно. Хоёр тамирчин хоёулаа жиндээ амжилттай орсон бөгөөд МакГрегор бага зэрэг хүнд байлаа.
THE FINAL FACE OFF OH MY LORD TOMORROW NIGHT WILL BE EPIC!!!!!! #MayweatherMcGregor #ConorMcGregor #FloydMayweather pic.twitter.com/SWtRSdtOqJ
— UFC (@ufc) August 25, 2017
Конор МакГрегор – 69.39 кг.
153 for #ConorMcGregor#MayweatherMcGregor pic.twitter.com/K89uDYRzZ8
— UFC (@ufc) August 25, 2017
Флойд Мейведер – 67.81 кг
149.5 for #FloydMayweather#MayweatherMcGregor pic.twitter.com/6idpdVlRJv
— UFC (@ufc) August 25, 2017
Невада мужийн комиссоос “Мэйведер – МакГрегор” супер тулааны шагналыг зарлалаа. Ялагдашгүй аварга Флойд Мэйведер 100 сая доллар авах бол Конор МакГрегор 30 сая доллар авна. Энэ бол албан ёсны шагнал бөгөөд тасалбар, телевизийн орлого зэрэг нэмэлт шагнал ч их бий. Тоглолтоос нийт 600 сая долларын орлого орно гэж байгаа нь бокс, холимог тулааны түүхэнд хамгийн их болон үлдэнэ. Флойдын орлого 400 сая болон нэмэгдэх магадлалтай бол Конор 100 сая авах боломжтой. Учир нь энэ тоглолтын хамгийн сайн суудлын тасалбар 14995 долларын үнэтэй бол рингний дэргэдэх суудал 5000 доллар, хамгийн хямд билет 1571 доллараар зарагдаж байна. Дэлхий даяар нэг тэрбум айл өрх энэ тулааныг үзнэ гэж Дана Уайт зарласан.
Хэдий ямар нэг цолын төлөөх тулаан биш ч WBC холбооны ерөнхийлөгч Маурисио Сулейман нэг сая долларын үнэтэй аваргын бүсийг ялагчид дурсгахаа амалсан. Энэхүү бүс нь мөнгө, алт, матрын арьсаар хийгдсэн бөгөөд алмааз эрдэнэн шигтгээтэй юм.
Боксын аварга боксын дүрмээр холимог тулааны аваргыг ялах нь ойлгомжтой гэгдэж байгаа ч сүүлийн үед Конор дээр бооцоо тавих хүний тоо эрс нэмэгджээ.