1 мин

“Сүү” компанийн цэвэр ашиг 43 хувиар өсчээ

Э.Хулан 2017.08.28 48 41 12

Өнгөрсөн зургадугаар сард Монголын хөрөнгийн биржээр дамжуулан 6 тэрбум төгрөгийн бонд амжилттай гаргасан “Сүү” компани энэ оны эхний хагас жилийн санхүү, үйл ажиллагааны тайлангаа танилцуулжээ. Монголын хөрөнгийн биржийн нэгдүгээр ангилалд бүртгэлтэй тус компанийн цэвэр ашиг тайлант хугацаанд 43 хувиар өсч, 2.3 тэрбум төгрөгт хүрсэн байна. 

"Сүү" компани нь энэ оны зургадугаар сарын 29-ний өдөр "Сүү бонд"-ыг олон нийтэд нээлттэйгээр санал болгон арилжиж, нийт 6 тэрбум төгрөгийн санхүүжилтийг амжилттай татан төвлөрүүлсэн нь дотоодын хөрөнгийн зах зээлд хамгийн өндөр үнийн дүн бүхий өрийн хэрэгсэл гаргасан түүхэн амжилтыг тогтоосон билээ. 

Тайлант хугацаанд тус компанийн үйл ажиллагаанд дараах өөрчлөлт гарчээ.

Эрүүл мэндийн ач холбогдолтой шинэ бүтээгдэхүүн болох Биофит таргийг худалдаанд гаргав.

Сүү, сүүн бүтээгдэхүүний үйлдвэрлэлийн хэмжээ сүүлийн 11 жил тасралтгүй өсч байгаа бөгөөд тайлант хугацаанд өмнөх оны мөн үеэс 19.4 хувиар өсч 13500 тоннд хүрсэн байна. 

Борлуулалтын машины тоог нэмэгдүүлснээр хүргэлт, түгээлт сайжирч, хэрэглэгч болон харилцагчийн гомдол 53.9 хувиар буурсан.

Борлуулалтын орлого өмнөх оны мөн үеэс 10.2 хувиар өсч 24 тэрбум төгрөгт, цэвэр ашиг 43 хувиар өсч 2.3 тэрбум төгрөгт тус тус хүрсэн үзүүлэлттэй байна. 

“Сүү” компани нь цаашид Монгол Улсын уламжлалт хэрэглээ сүү, сүүн бүтээгдэхүүнийг орчин цагийн хэрэглэгчдийн хэрэгцээ шаардлагад нийцүүлэн үйлдвэрлэн түгээх эрхэм үйлсдээ илүү дэвшилтэт техник, технологийг нэвтрүүлэн, инновацид тулгуурласан, байгальд орчинд ээлтэй үйл ажиллагаа явуулж, улирал тутамд үйл ажиллагааны болон ашигт ажиллагааныхаа талаар олон нийтэд мэдээлэн ажиллахаа мэдэгдэв.

Э.Хулан 2017.08.28