Төлбөрийн тэнцлийн алдагдал 48.8 сая ам.доллар болжээ
Энэ оны долоодугаар сарын төлбөрийн тэнцлийн урьдчилсан гүйцэтгэлийг Монголбанкнаас танилцуулжээ. Эндээс үзэхэд, төлбөрийн тэнцэлийн алдагдал 48.8 сая ам.доллар болсон байна. Харьцуулахад, өнгөрсөн оны мөн үед 41.3 сая ам.долларын алдагдалтай байсан юм.
Тэгвэл урсгал ба хөрөнгийн дансны тэнцэл 358.9 сая ам.долларын алдагдалтай гарч, алдагдлын хэмжээ өнгөрсөн оны мөн үеэс 37 хувиар буурсан байна. Энэхүү өөрчлөлт нь бараа ба үйлчилгээний дансны алдагдал 470.2 сая ам.доллараар буурч 248.1 сая ам.долларын ашигтай гарснаар тайлбарлагдаж байна.
Мөн санхүүгийн дансны тэнцэл 313 сая ам.долларын ашигтай гарсан үзүүлэлтэй байна. Өнгөрсөн оны мөн үед Монгол Улс 645.3 сая ам.долларын эх үүсвэрийг гадаадаас авсан бол тайлант оны эхний долоон сарын байдлаар 313 сая ам.доллар буюу цэвэр дүнгээр гадаад санхүүжилт 332.4 сая ам.доллараар буурсан үзүүлэлттэй байгаа юм.