La La Land-ийн найруулагч “Netflix”-ийн цоо шинэ мюзикл цуврал дээр ажиллаж байна
“The Eddy” гэх 8 ангит мюзикл цуврал драм нь орчин үеийн олон соёлын нийлэмж болсон Парис хот дахь нэгэн клуб, хаус хамтлаг зэрэг сэдвүүдийн хүрээнд хийгдэх юм байна.
“Netflix” болон дэлхийн хамгийн нөлөө бүхийн найруулагчид ямар нэг шалтгаанаар цуглах болжээ. Учир нь дэлхийн хамгийн том кино стрийминг компани La La Land болон Whiplash кинонуудын найруулагч Дэмиэн Шазельтэй “The Eddy” гэх 8 ангит мюзикл цуврал драм бүтээх гэрээнд гарын үсэг зуржээ. Энэхүү бүтээл нь орчин үеийн олон соёлын нийлэмж болсон Парис хот дахь нэгэн клуб, клубын эзэн, хаус хамтлаг зэрэг сэдвүүдийн хүрээнд хийгдэх юм байна.
“The Eddy” кино нь франц, англи, араб хэлүүдийн харилцан яриагаар явагдах бөгөөд “Grammy Awards”-ийн шагналт, хөгжмийн зохиолч, продюссер Глэн Баллардын хөгжмүүдээр хөглөгдөх аж.
“Би үргэлж Парист зураг авалт хийхийг мөрөөддөг байсан. Түүнээс гадна би Жэк, Глен, Алан нартай энэ бүтээл дээр ажиллах гэж байгаадаа тун баяртай байна” хэмээн Дэмиэн Шазель ярьжээ.