UFC-ийн аварга Жон Жонс 4 жилээр эрхээ хасуулна
В сорьцноос ч туринабол илэрсэн тул тоглолтын үр дүнг хүчингүй болгосон байна.
UFC холбооны хагас хүнд жингийн аварга Жон Жонс сэргээш хэрэглэсэн нь тогтоогдлоо. Өнгөрсөн жил сэргээшийн хэргээр 1 жилийн “ял” эдлээд эргэн ирж, аваргын бүсээ буцаан аваад байсан түүний ирээдүй ийнхүү бүрхэг боллоо.
Жон Жонс өнгөрсөн долоодугаар сарын 29-нд Анахаймд болсон UFC 214 тэмцээнд Даниэль Кормьег гуравдугаар үед хүнд цохилтоор ялан, хагас хүнд жингийн аваргын бүсийг эзэмших болсон. Гэвч урд өдөр нь буюу 28-нд өгсөн сэргээшийн шинжилгээний хариу эерэг гарсан. В сорьцноос ч туринабол илэрсэн тул Калифорни мужийн “California State Athletic Commission” Кормьетэй хийсэн тоглолтын үр дүнг хүчингүй болгосон байна. UFC холбооны дэд ерөнхийлөгч Жефф Новицкигийн хэлснээр Жон Жонсын холимог тулаанд оролцох эрхийг 4 жилээр хасан, аваргын бүсийг нь хураан авах болжээ.