1 мин

"Mother of Pearl" шинэ загвартаа МОНГОЛ НООЛУУРАН ДЭР танилцууллаа

Хамгийн хямд дэр нь 40 ам.долларын үнэтэй.

2017.09.19 20 18 7

8

Дэлхийн хамгийн нэр нөлөө бүхий брэнд, загварын компаниуд шинэ коллекцио танилцуулдаг “Лондонгийн загварын 7 хоног” өнөөдөр өндөрлөж байна. Өнгөрөгч бямба гарагт эмэгтэй хувцасны брэнд үйлдвэрлэлийн “Mother of Pearl” компаниас 2017 оны намрын шинэ загвараа өвөрмөц дэртэйгээр танилцуулсан нь олны анхаарлыг багагүй татжээ.

Тус брэндийн танилцуулгын гарааны үеэр загвар өмсөгчид унтлагын хувцастай, өвөрмөц содон хийц бүхий ноолууран дэрний хамт гарч ирсэн юм. Эдгээр нь монгол ноолуураар хийсэн тансаг зэрэглэлийн дэр бөгөөд хамгийн хямд нь 40 ам.долларын үнэтэй аж. 

“Одоогийн нийгэмд улс төрийн байдал, байгалийн гамшиг гээд хүн амар тайван явах аргагүй болжээ. Тиймээс бид хэрэглэгчдээ гэртээ тухлан, ноолууран дэрээ тэврэн хэвтэхдээ амар амгалан байдлыг мэдрээсэй гэж хүссэн. Ялангуяа монгол ноолууран хөнжил, дэр, арьс шир, ноос ноолууран бүтээгдэхүүнүүд маань худалдан авагчдад яг л тэврүүлээд дулаахан хэвтэх шиг санагдуулна” гэж тус брэндийн үүсгэн байгуулагч Эми Повни хэлжээ.

“Mother of Pearl” брэндийн монгол ноолууран хөнжил 9 гаруй кг жинтэй бөгөөд интернет худалдаагаар 300 гаруй ам.долларын үнэтэй. “Танд ийм жинтэй хөнжил хүнд санагдаж магадгүй ч, маш дулаан тухлаг байдлыг мэдрүүлэх болно. Нүдээ аниад бодит байдлаас тасар” гэж тус брэндийн сайтад бичжээ.

Эх сурвалж: Vogue

2017.09.19

8