'Airbnb'-ээс 'цэвэрхэн' байр захиаллаа гэж бодтол контейнер угтжээ
Аялагчдад хямд өртгөөр тухтай, цэвэрхэн газар байрлах боломжийг 'Airbnb' вэб сайт олгосноороо сая сая хүний талархалыг хүлээдэг. Зарим хүмүүст итгэмээргүй хямд үнээр таван одтой зочид буудалтай эн зэрэгцэхүйц тансаг байранд байрлах аз таардаг бол заримыг нь байж боломгүй нөхцөл байдал угтаж байна.
Саяхан Их Британийн иргэн Бен Спеллер Амстердам руу аялахаар болж 'Airbnb' сайтад байршуулсан зарын дагуу тусдаа угаалгын өрөөтэй, цэвэрхэн байранд буудаллахаар болж, хоногийн 150 доллар төлжээ. Спеллер захиалсан байрандаа хоноглохоор очоод нүдэндээ ч итгээгүй гэнэ. Түүнийг гудамжинд хууль бусаар байршуулсан төмөр контейнер угтсан байна.
Уг контейнерт ор, гурван дэрнээс өөр юу ч байгаагүй бөгөөд контейнерийн тусгаарласан хэсэгт хүн хэрэглэхэд ч хэцүү ариун цэврийн өрөөрхүү хэсэг байсан гэж тэрээр ярьжээ.
Харин 'Airbnb' хэвлэлийн төлөөлөгч уг үйл явдалтай холбогдуулан "Хүмүүст буруу ойлголт төрүүлсэн, залилан мэхэлсэн зар манай флатформ дээр байрших учиргүй. Бид ийм төрлийн үйлчилгээнээс сэргийлэхийн тулд хамгаалалтаа байнга сайжруулж байгаа. Дэлхий даяар хагас тэрбум хүн 'Airbnb'-г ашиглаж аяллын үеэр хоноглох байраа олсон. Өдөр бүр 2 сая хүн манай сайт руу хандаж, буудаллах газраа захиалж байна. Үүнтэй төстэй хэрэг маш цөөхөн гардаг" гэжээ.
Эх сурвалж: Gizmodo