Ажлын орчинд хүмүүсийн анхаарлыг юу хамгийн их сарниулдаг вэ?
Төвлөрч ажиллахад саад болдог зүйлсэд дан ганц орчин нөлөөлдөггүй, хамт ажилладаг хүмүүс ч "хувь нэмэр" оруулдаг болох нь судалгаагаар тогтоогджээ.
Дижитал маркетингийн чиглэлээр судалгаа хийдэг Toluna компани дэлхийн хамгийн том онлайн сургалтын платформуудын нэг болох Udemy-тэй хамтран ажиллахад саад болдог хүчин зүйлсийг тодруулах зорилготой судалгааг явуулжээ. Тэд судалгаандаа бүтэн цагаар ажилладаг, 18-аас дээш насны 1000 орчим хүнийг хамруулсан байна.
Судалгаанд оролцсон хүмүүсийн хамгийн олон буюу 80 хувь нь хэт их ярьдаг хамтран ажиллагсад анхаарлыг нь сарниулдаг гэж хариулжээ. Харин удаах хүчин зүйлүүдэд оффисын орчны дуу чимээ, ажил дээр ойр ойрхон гардаг өөрчлөлт, уулзалтууд, сошиал медиа хэрэглээ багтсан байна.
Тайланд дурдсанаар, анхаарал сарниулдаг зүйлсийг бууруулснаар ажилчдын бүтээмж, эрч хүч, өөртөө итгэлтэй байдал, сэтгэл ханамж нэмэгддэг гэжээ.
Эх сурвалж: We Forum