1 мин

Авьяасын үзүүлбэрийн оронд химийн туршилт хийсэн бүсгүй миссийн тэмцээнд түрүүлжээ

Б.Саруул 2019.07.08 29 7 3

2132

Миссийн тэмцээний оролцогчид ихэнхдээ дуулах, бүжиглэх, хөгжмийн зэмсэг тоглох зэргээр авьяасаа үзүүлдэг билээ. Тэгвэл эдгээр авьяасын оронд өөрийн эзэмшсэн мэдлэг, мэргэжлийнхээ онцлогийг харуулж чадсан биохимич бүсгүй миссийн титэм гардсан үйл явдал болжээ. Тодруулбал, өнгөрөгч зургаадугаар сарын 22-нд Виржиниагийн миссийн тэмцээн зохион байгуулагдсан бөгөөд тус тэмцээний оролцогч 24 настай Камилла Шриер авьяасын үзүүлбэр төрөлд химийн туршилт хийж үзэгч, шүүгчдийг алмайруулсан байна. 

Камилла Шриер эдүгээ Виржиниагийн Их сургуульд эм зүйчийн чиглэлээр докторын зэргээ хамгаалахаар суралцаж байгаа ба STEM буюу шинжлэх ухаан, технологи, инженерчлэл, математикийн салбарт илүү олон эмэгтэйг ажиллахыг уриалж энэхүү туршилтаа хийжээ.  Тэрээр "Миссийн тэмцээнд оролцогч бүсгүйчүүдийн олонхи нь маш авьяаслаг бүжигчин, гайхалтай хоолойтой дуучид байдаг. Харин шинжлэх ухааны туршилт хийх нь миний хувьд нэлээд эрсдэл дагуулсан, мөн бусдаас ялгарсан үзүүлбэр байлаа. Гэвч хэвшмэл сэтгэлгээг халж, хил хязгаарыг давах нь Америкийн мисс эмэгтэйн бас нэг авьяас гэж бодож байна. Би хайрцгаас гадуур сэтгэхийг зорьсон, тэр минь ч биеллээ оллоо" хэмээн ярьжээ. 

Тэрээр ирэх есдүгээр сард болох Америкийн миссийн тэмцээнд мужаа төлөөлж оролцох юм байна. 

Эх сурвалж: Insider

Б.Саруул 2019.07.08

2132