Автомашингүй өдрийн онцлох фото агшнууд
Нийслэлийн Засаг даргын захирамжаар жил бүрийн тавдугаар сарын гурав дахь долоо хоногийн Бямба гарагийг бүх нийтээр биеийн тамир, спортыг дэмжих “Автомашингүй өдөр” болгон зарлаж, “Улаанбаатар марафон” олон улсын гүйлтийн тэмцээнийг зохион байгуулдаг уламжлалтай.
Мэргэжлийн гүйлтийн тамирчид төдийгүй нийслэлийн иргэд, Монгол Улсад ажиллаж, амьдардаг гадаадын иргэдийг хамруулсан “Улаанбаатар марафон” гүйлтийн тэмцээн зургаа дахь жилдээ амжилттай болж өнгөрлөө. Марафонд оролцогчид 1500 метрээс 42 км хүртэл нийт зургаан гүйлтийн зайд хурд, хүчээ сорьдог бөгөөд энэ жил уг тэмцээнд 30 мянга гаруй хүн оролцжээ. Мөн энэ жил иргэдэд зориулсан эрүүл мэндийн гүйлт, гэр бүлийн гүйлт, хүүхдийн насны ангиллыг нэмж оруулсан байна.