1 мин

Б.Болортуяа хүрэл медаль хүртэж, Э.Цэндбаатар мөнгөн медалийн төлөө тулалдахаар боллоо

Ж.Мөнхзул 2019.09.19 1 1

11

Казахстаны нийслэл Нур-Султан хотод зохион байгуулагдаж буй чөлөөт бөхийн ДАШТ-ий эмэгтэйчүүдийн 55 кг-ын жинд барилдсан Б.Болортуяа Туркийн бөх Бедиха Гантай хүндхэн барилдааныг хийж 12:9-ийн харьцаатай ялж, хүрэл медалиар энгэрээ мялаалаа.

Тэрбээр эхний тойрогт Энэтхэгийн Лалитаг 10-3-аар ялж, шигшээ 16-д Пан Америкийн аварга шалгаруулах тэмцээний хүрэл медальт Америкийн Винчестерт ялагдсан юм. АНУ-ын Винчестер Туркийн Бедиха Ганыг ялсан тул дагах барилдаан хийх эрхтэй болсон. 

Түүний дагах барилдааны өрсөлдөгч нь Кыргызстаны бөх, 2016 оны Оюутны ДАШТ-ий хүрэл медальт Мадина Надирова байсан бөгөөд түүнийг эхний үед 10-0 оноогоор цэвэр яллаа. Тус жингийн алтан медалийг Америкийн бөх Винчестер хүртсэн юм. 

Тэмцээний гурав дахь өдөр буюу өнөөдөр эрэгтэйчүүдийн 57, 65, эмэгтэйчүүдийн 62, 68 кг-ын жингийн урьдчилсан болон хагас шигшээ барилдаан болно. Манай улсаас хөдөлмөрийн баатар С.Батцэцэг, гавьяат тамирчин Э.Бэхбаяр, ОУХМ Т.Тулга, Э.Гантуяа нар хүч үзэх юм.

Харин энэ өдрүүдэд ОХУ-ын Екатеринбург хотын "Екатеринбург Экспо" ордонд зохион байгуулагдаж буй сонирхогчдын боксын 20 дахь удаагийн ДАШТ-ий  57 кг-ын жинд тулалдаж буй Азийн наадмын болон Ази тивийн аварга Э.Цэндбаатар Ирландын Курт Уолкертэй тулалдаж, 5:0  харьцаагаар ялж хүрэл медалийн болзол хангалаа. Одоо түүнийг цаашид медалийн өнгөө хувиргах тулаанууд хүлээж байна.

Ж.Мөнхзул 2019.09.19

11