Чөлөөтийн дэлхийн аварга Кайл Дэйк Хабибыг тулаанд дуудлаа
Чөлөөт бөхийн ДАШТ-ий хошой алтан медальт, АНУ-ын бөх Кайл Дэйк холимог тулааны "UFC" холбооны хөнгөн жингийн аварга Дагестаны тулаанч Хабиб Нурмагомедовыг халз тулаанд дууджээ. Гэхдээ тэр Хабибтай тулалдахыг хүсээгүй, харин чөлөөт бөхөөр барилдах санал тавьсан ажээ.
Кайл ирэх жилийн Токиогийн олимпийн наадамд оролцохоор бэлтгэлээ базааж байгаа учир холимог тулааны спортод хөл тавих бодолгүй байгаа гэнэ. Кайл Дэйк нь чөлөөт бөхийн ДАШТ-ий 2018, 2019 оны аварга, мөн "Яшар Догу 2018", "Иван Ярыгин 2018", "Парисын Гран-при 2017" зэрэг сүүлийн жилүүдэд болсон томоохон тэмцээнүүдээс аваргын алтан медалийг хүртээд буй юм.
Харин Хабиб Нурмагомедовын хувьд холимог тулааны "UFC" холбооны аварга бөгөөд 28 тулалдахдаа нэг ч удаа ялагдал хүлээгээгүй, 2016 оны шилдэг тулаанч юм.
Мөн тэрбээр байлдааны самбо бөхийн 2009, 2010 оны дэлхийн аварга, Армийн гардан тулааны Европын аварга, 2012 оны грэпплингийн дэлхийн аварга тамирчин билээ.