3 мин

Энэ зуныг адал явдлаар дүүргэх сонирхолтой 10 цуврал

Ub.life 2019.07.05 14 6 2

920

Энэ зун үзэх цувралуудынхаа жагсаалтыг гаргаж амжсан уу? Тэгвэл бид нэг л эхлүүлчихвэл салахын аргагүй болгодог сонирхолтой цувралуудыг та бүхэнд санал болгож байна. Нэмж хэлэхэд зарим кинон дээр гэмт хэрэг, аллага гарах учраас киноны ард бичсэн насны хязгаарын дагуу үзэхийг зөвлөж байна.   

1. Sex education (+18)

Нэрийг нь сонсоход "том хүнийх" юм шиг сонсогдох ч үнэндээ өсвөр насныхны өмнө тулгардаг түгээмэл асуудлыг харуулдаг. Эцэг, эх байтугай үеийнхнээсээ асуухаас ч ичиж эмээдэг бэлгийн амьдралтай холбоотой зүйлсийг хөндсөнөөрөө онцлог юм. Түүнчлэн уг цувралд жендэрийн тэгш байдлыг харгалзан үзэж нийгэмд буй олон төрлийн харилцааг тусгаж харуулсан нь сайшаалтай. 

2. You (+15)

Номын дэлгүүрт ажилладаг Жөү Бек хэмээх бүсгүйд анхны харцаар дурлана. Жөү интернет ашиглан Бекийн тухай бүх мэдээллийг олж авдаг. Ингээд тэрээр Бектэй ойртохын тулд түүний санаанд ч оромгүй алхмуудыг хийж эхлэх болно. 

3. Deadly class (+16)

1980-аад он. Орон гэргүй Маркус хэмээх өсвөр насны хүү чадварлаг алуурчдыг бэлтгэн гаргадаг нууцлаг сургуульд элсэн орсноор үйл явдал эхэлнэ. Энэ нь түүнд амар хялбар амьдрах боломжийг олгоно гэж Маркус найдсан боловч нөхцөл байдал эсрэгээрээ эргэж, жинхэнэ тамын газар ирснээ тэрээр ухаарна.  

4. Love, Death and Robot  (+18)

Нэг анги нь 15 минутаас хэтэрдэггүй анимейшн төрлийн бүтээл. Анги тус бүрт өөр үйл явдал гарах бөгөөд робот, хайр дурлал, гэмт хэргийн сэдэвтэй үйл явдал түлхүү гарна. 

5. Riverdale (+14)

Нийт гурван бүлэгтэй уг цувралын эхний бүлэгт анир чимээгүй Ривердэйл хотод нэгэн нууцлаг хүн амины хэрэг гарснаар хотын иргэдийн амар тайван байдал бүхэлдээ өөрчлөгдөнө. Ахлах сургуулийн сурагчид болох Арчие, Вероника, Бетти, Жагхэд нарын уг хэргийн учир зангилааг тайлахаар хичээнэ. Гэмт хэрэгтнийг илрүүлсний дараа хотод хар Юүдэнт гэх алуурчин ирж, Арчиегийн эцгийг хөнөөхийг завдсанаар хоёрдугаар бүлэг эхэлнэ. Харин гуравдугаар бүлэгт Ривердэйл хотод Вероникагийн аав өөрийн ноёрхлоо тогтоохыг оролдох болно.

6. Pretty Little Liars (+12)

Рөүзвүүд хотноо амьдардаг таван найзын нэг нь учир битүүлгээр алга болно. Үүнээс хойш тэд найзлахаа ч больж, холбоо харилцаа тасарна. Эл үйл явдлаас жил гаруйн дараа хотоос нүүгээд байсан Ариа буцаж ирснээр дахин хэрэг мандана. Алга болсон найз Алисоноос нь тэдэнд нууц зурвас илгээж эхэлнэ. Төд удалгүй цагдаа нар Алисоны цогцсыг олох ч зурвас ирсээр л байв. Энэ үйл явдлын ард хэн байгаа бол? 

7. Skam (+16)

Нийт дөрвөн бүлэгтэй Скам хэмээх Норвегийн цувралд өсвөр насныхны хайр дурлал, нөхөрлөлийг харуулдаг ба бүлэг тус бүр нэг дүрээ онцлон харуулах аж. 

8. Gypsy (+13)

Сэтгэлзүйч мэргэжилтэй Жин бүсгүй нөхөр болон 9 настай охинтойгоо амьдардаг, ажилдаа дуртай жирийн л нэг эмэгтэй. Жиний өвчтөнүүддээ өгдөг зөвлөгөө энгийн боловч зөвлөгөө өгөх арга нь тун өвөрмөц. Тэрээр өвчтөнүүдтэйгээ ярилцан амьдралд нь саад бэрхшээл учруулж буй хүмүүстэй нууц нэрээр уулзаж, асуудлыг шийдэхийг зорьдог. Эхэндээ энэ арга амжилттай хэрэгжиж, үйлчлүүлэгчид нь ч түүнд сэтгэл хангалуун байх аж. Гэвч Жиний нууцлаг амьдралд шинэ хүн орж ирснээр амьдрал нь орвонгоороо эргэнэ.

9. Impulse (+16)

Өсвөр насны охин Хенри санамсаргүй байдлаар өөрийн ер бусын хүчээ илрүүлснээр түүний эргэн тойронд олон хачирхалтай үйл явдлууд өрнөж эхэлнэ. 

10. The Society (+10)

Бие даасан байдал, эрх чөлөө хүсэхдээ эцэг эхийгээ үгүй болоод өгөөсэй гэж боддог өсвөр насныхан цөөнгүй. Гэхдээ тэд үнэхээр байхгүй болчихвол хариуцлага хүлээх чадваргүй өсвөр насны хүүхдүүдээр дүүрэн дэлхий ертөнц юу болж хувирах бол? Хариултыг The Society цувралаас олж мэдээрэй. 

Бэлтгэсэн: О.Сансармаа

Ub.life 2019.07.05

920