1 мин

"Эрдэнэт" 40 сая доллар төлж "Стандарт"-ын өрөө хаажээ

Одоо шүүх буруутай этгээдүүдээр "Эрдэнэт үйлдвэр"-ийн хохирлыг барагдуулах ёстой.

Б.Энхцэцэг 2019.04.05 1

29

“Эрдэнэт үйлдвэр” 40 сая ам.долларыг “Эрсдлийн сан”-гаасаа гаргаж ӨАБНУ-ын “Стандарт” банкинд төлснөөр олон улсын арбитрын шүүх дээр үүсээд байсан маргаанд цэг тавьж, өр төлбөрөө барагдуулжээ. Энэ тухай Шадар сайд Ө.Энхтүвшин, “Эрдэнэт үйлдвэр”-ийн ерөнхий захирал Х.Бадамсүрэн нар өнөөдөр мэдэгдэв. 

“Жаст” компанийн захирал Ш.Батхүү 2011-2012 онд Өмнөд Африкийн “Стандарт” банкнаас 160 сая ам.долларын зээл авахдаа хуурамчаар гарын үсэг үйлдэн “Эрдэнэт үйлдвэр”-ийн 51 хувийг барьцаанд тавьсан буюу “Эрдэнэт үйлдвэр”-ийг уг зээлийн гэрээнд батлан даагчаар оролцуулсан. Үүнээс болж тус үйлдвэр “Стандарт” банкинд учирсан хохиролд 51 сая ам.доллар төлөх шийдвэрийг Лондон дахь олон улсын арбитрын шүүх гаргасан билээ. 

Ерөнхий сайд У.Хүрэлсүх 2018 онд энэ асуудлаар Шадар сайд Ө.Энхтүвшинээр ахлуулсан ажлын хэсэг томилж хуульчдын баг ажиллуулсан бөгөөд тэд өнгөрсөн хугацаанд гуравдагч талаар зуучлуулан “Стандарт” банктай олон удаагийн яриа хэлэлцээ явуулсны дүнд өр төлбөрийг 40 сая доллараар тогтоон нэн даруй төлөх үүрэг хүлээжээ. “Эрдэнэт үйлдвэр”-ийн “Эрсдлийн сан”-гаас 40 сая доллар гарган “Стандарт” банкинд төлж барагдуулсан бөгөөд үүгээр өдөр өдрөөр өсөн нэмэгдэж байсан хүү болон үндсэн төлбөрийн асуудал бүрмөсөн эцэслэв. Тус үйлдвэрийн гадаад зах зээлд учраад байсан дам эрсдэлүүд арилсан гэж Засгийн газрын ажлын хэсэг онцолж байна. 

“Эрдэнэт үйлдвэр”-ээс гарсан 40 сая ам.долларыг гэм буруутай этгээдүүдээр төлүүлэх асуудлыг шүүхээр шийдүүлнэ. Шадар сайд Ө.Энхтүвшин “Шүүх хуулийн байгууллага өмнө нь энэ хэрэгт маш хойрго ханддаг байсан. Одоо удирдлага нь солигдсон учраас шуурхай авч үзээд, “Эрдэнэт үйлдвэр”–ийн “Эрсдлийн сан”-гийн 40 сая ам.долларыг төлүүлнэ гэж найдаж байна” хэмээв.

Б.Энхцэцэг 2019.04.05

29