FIBA 3x3: Дэлхийн гранпри тэмцээнд “Улаанбаатар ММС Энержи” буюу ази тивийн баг анх удаа аварга болов
Ази тивийн баг анх удаа Дэлхийн гранприд түрүүллээ. Тодруулбал, Монгол Улсын "Улаанбаатар ММС Энжержи" баг ФИБА3х3-ын энэ улирлын хамгийн сүүлийн Дэлхийн гранпри Жэжүгийн гранприд 13:10 харьцаатай Словений "Пиран" багийг хожиж аварга боллоо.
Гэрэл зургийн эх сурвалж: "Mongolian 3x3 Basketball Association/MGL3x3" хуудас.
Өнгөрсөн амралтын өдөр БНСУ-ын Жэжүд үргэлжилсэн дэлхийн гранпри тэмцээнд манай багийнхан АНУ-ын "Нью-Йорк Харлем", БНСУ-ын "Инжэ" багтай нэг хэсэгт орсон. "Улаанбаатар ММС Энжержи" баг АНУ-ын "Нью-Йорк Харлем" багт хожигдож, "Инжэ" багийг хожиж хэсгээсээ 2-р байраар гарсан. Улмаар хасагдах шатанд дэлхийд эрэмбээрээ тэргүүлдэг Сербийн "Земун" багийг 17:16 харьцаатайгаар ялж, шөвгийн дөрөвт ОХУ-ын "Нева" багийг хожиж аваргын төлөө шалгарсан. Ингээд аваргын төлөө 13:10 харьцаатай Словенийн Пиран багийг хожиж аварга болов. Энэ тэмцээнд түрүүлснээр манай баг 15 мянган ам.долларын шагнал хүртсэн төдийгүй Саудын Арабын их дуулгад оролцох эрхээ бататгалаа. Манай тамирчид энэ сарын 09-ний лхагва гарагт эх орондоо ирэх юм байна.
Түүнчлэн Жэжүгийн Дэлхийн гранпригийн хамгийн үнэ цэнэтэй тоглогч буюу MVP-гээр "Улаанбаатар ММС Энержи" багийн тоглогч ОУХМ Даваасамбуугийн Дэлгэрням шалгарлаа.
Видео: Аваргын төлөө Словений Пиран багтай хэрхэн тоглосныг эндээс үзээрэй.