Монголын далбаатай хөлөг онгоц далайчиддаа цалин өгдөггүй байжээ
"Surov" хөлөг онгоц далайчиддаа өнгөрсөн оны 10-р сараас хойш цалин өгөөгүй, зарим нь 9-р сараас цалингаа аваагүй байна.
Өнгөрсөн сарын 25-ны шөнө ОХУ-ын эрэг орчим Монголын далбаатай ачааны хөлөг онгоц сүйрсэн талаар бид мэдээлсэн билээ. Оросын "Живая Кубань" сайтад мэдээлснээр ачааны "Surov" хөлөг онгоц Туркийн Искендерун боомтоос гарч, Оросын Кавказ боомтод ачаагаа буулгах ёстой байжээ.
ОХУ-ын аврагч нар багийн бүрэлдэхүүн болох 9 орос, 2 азербайжан иргэнийг аварч, эмнэлгийн тусламж үзүүлсэн байна.
Шинэ он гарсан ч "Surov" хөлөг онгоц ОХУ-ын эрэгт хайргадсан хэвээр байсаар байна. Хөлгийн ёроол цоорсон тул их хэмжээний ус орж, хөдлөх аргагүй болжээ. ОХУ-ын Хилийн албаны газраас хөлгийг эзэмшигч Туркийн компанид хөлгийг зөөх, багийн бүрэлдэхүүнийг шилжүүлэх бичиг явуулсан ч одоо болтол хариу байхгүй байгаа гэнэ.
Энэ үед хөлгийн багийнхан гомдол гаргаснаар Новороссийскийн Тээврийн Прокурорын газраас тус хөлгийг шалгаж эхэлсэн байна. Багийн 11 гишүүний 9 нь орос иргэн байсан нь ч мэдээж нөлөөлжээ. "Surov" хөлөг онгоц далайчиддаа өнгөрсөн оны 10-р сараас хойш цалин өгөөгүй, зарим нь 9-р сараас цалингаа аваагүй байна.
Новороссийскийн Тээврийн Прокурорын газрын байцаагч Ольга Ананьина ТАСС агентлагт "Хөлгийн ахмад, ахлах туслах хоёр Азербайжаны иргэн, үлдсэн нь орос далайчид. Монголын далбаан дор явдаг болохоор Үйлдвэрчний эвлэлийн ажилд хүндрэлтэй байна. Хөлгийг Туркийн "Vikaro Overseas Co" компани эзэмшдэг. Бид хэргийг шалгаж байна" гэж мэдээлжээ.