1 мин

Сүмо: Аваргууд бүгд зодоглоно

Энэ тэмцээнд ёкозүна Кисэносатогийн хувь заяа шийдэгдэх юм.

М.Сугар-Эрдэнэ 2019.01.11

Мэргэжлийн сүмогийн Хацү башё энэ сарын 13-нд Токио хотын Кокүгикан ордонд эхлэх гэж байна. Өнгөрсөн оны 11 дүгээр сарын тэмцээнд барилдаагүй их аварга Хакүхо, ёкозүна Какүрюү, тэмцээний голоос гарсан ёкозүна Кисэносато нар зодоглохоо мэдэгдсэнээр өнгөрсөн оны Намрын тэмцээнээс хойш аваргууд анх удаагаа бүгд барилдах болж байна. Тэр тэмцээнд Хакүхо 15 даван түрүүлж, Какүрюү, Кисэносато нар 10 давсан билээ.

Хацү башёгийн эхний өдөр их аварга Хакүхо комүсүби Миёогирюү, ёкозүна Какүрюү маэгашира Точиоозан, Кисэносато комүсүби Митакэүмитэй учраа таарчээ. Харин хоёр дахь өдөр Хакүхо Точиоозан, Какүрюү комүсүби Митакэүми, Кисэносато Ичиножёотой барилдана.
Энэ тэмцээнд ёкозүна Кисэносатогийн хувь заяа шийдэгдэх юм. Хэрэв тэр 50 хувийн амжилт үзүүлэхгүй, эсвэл гэмтээд тэмцээнийг орхивол шууд зодог тайлах болно.