Точиношин тэмцээнийг орхилоо
Точиношин Хаврын тэмцээнд кадобан болж, озэки цолоо хамгаалж барилдах болно.
Мэргэжлийн сүмогийн Хацү башёд эхний 4 өдөр дараалан ялагдаад байсан озэки Точиношин өнөөдрөөс барилдахгүй болжээ. Тэмцээнээс 5 хоногийн өмнө бэлтгэл дээр баруун гуяндаа гэмтэл авсан нь нөлөөлж, нэг ч давж чадсангүй. Өнөөдөр түүнтэй учраа таарсан байсан Шёохозан ийнхүү барилдалгүй даваа авч байна.
Түүний багш Касүгано ояката "Тэмцээний 4 дэх өдөр Тамавашид унасныхаа дараа "Ёстой болохгүй байна" гэж надад хэлсэн. Гомдол, шалтаг хэлдэггүй Точиношин ингэж хэлж байгаа болохоор гэмтэл нь хүнд байна гэсэн үг. 2-р сард тойргийн барилдаан байхгүй болохоор сайн эмчлүүлээд Хаврын тэмцээнд зодоглоно" гэж сэтгүүлчдэд мэдээлсэн байна.
Точиношин Хаврын тэмцээнд кадобан болж, озэки цолоо хамгаалж барилдах болно. Өнгөрсөн оны Намрын тэмцээнд мөн кадобан барилдаад 9 давж байсан билээ.