2 мин

Хүний биед "хэрэггүй" илүү эрхтнүүд

Мухар олгой, эрэгтэй хүний хөх, агт араа хэрэггүй гэдгийг бид мэднэ.

М.Сугар-Эрдэнэ 2019.01.21

Дорса Амир бол Бостон хотын их сургуулийн эрдэмтэн. Тэрбээр сэтгэл судлал, эволюцийн хөгжлийн түүх судладаг бөгөөд твиттер хуудсаараа дамжуулан сонирхолтой хичээл заадаг. Ингээд түүний нэгэн хичээлийг авч үзье.

Хичээл ингэж эхэлсэн.

"Хүний биед илүү эрхтэн буюу эволюцийн явцад гүйцэтгэх үүргээ алдсан эрхтэн гэж байдаг. Үүнийг рудимент эрхтэн гэж нэрлэдэг"

Гараа ширээн дээр дээш харуулан тавиад чигчий, эрхий хуруугаа нийлүүл. Тодрон гарч байгаа зүйлийг харж байна уу? Үүнийг алганы урт булчин гэж нэрлэдэг. Эрт дээр үед модонд аврихад тус болдог байсан энэ булчин одоо ямар ч үүрэггүй. Хүн төрөлхтний 14 хувьд энэ булчин огт байхгүй.

Чихээ сайн хар даа. Гүвдрүү байгааг харж байна уу? Энэ бол Дарвины товруут булчин юм. Эрт дээр цагт чихээ хөдөлгөхөд хэрэгтэй байсан ч бидний хүзүү маш сайн хөгжсөн тул хэрэггүй болжээ.

Ахар сүүл. Биднийг сүүлтэй байсныг сануулдаг эцсийн баримт. Модон дээгүүр явахад тэнцвэр хадгалах үүргийг сүүл гүйцэтгэдэг байв. Одоо ч эхийн хэвлийд бүрэлдсэн үр хөврөл сүүлтэй байдаг ч дараа нь устдаг байна.

Нүдний буланд байдаг энэ ягаан зүйл юу юм бол гэж бодож байсан удаа бий юу? Гуравдагч аньсага хэмээх энэ эрхтэний тусламжтайгаар хүн зарим амьтан шиг нүдээ босоо анивчдаг байжээ.

Айх, даарахад арьс биржийн, үс босдог билээ. Эрт дээр үед аюул тохиолдоход үсээ босгож, дайсандаа том харагдан, сүрдүүлдэг байлаа. Мөн даарахад зөнгөөр үс босож, дулаацдаг байсан нь ийнхүү үлджээ.