1 мин

Шинэ оны анхны тэмцээнд "Big bowling-1” баг түрүүллээ

Нийт 8 сая төгрөгийн сантай тус тэмцээний аваргаар “Big bowling-1” баг тодорч, 2,999,999 төгрөгийн шагнал, аваргын цом, алтан медаль хүртлээ.

М.Сугар-Эрдэнэ 2019.01.21

“JA Bowling club”-ын нэрэмжит 2 дахь удаагийн өндөр шагналын сантай, багийн нээлттэй тэмцээн өнгөрөгч бямба гаригт “Big bowling” төвд боллоо. Тэмцээнд тус бүр 2 эмэгтэй, 3 эрэгтэй, нийт 5 гишүүнээс бүрдсэн 14 баг оролцож, ур чадвараа шалгасан юм.

Нийт 8 сая төгрөгийн сантай тус тэмцээний аваргаар “Big bowling-1” баг тодорч, 2,999,999 төгрөгийн шагнал, аваргын цом, алтан медаль хүртлээ.

Аман хүзүүнд шалгарсан “Winners-1” баг 1,999,999 төгрөг, гуравдугаар байранд орсон “Big bowling-2” баг 1,119,999 төгрөг, дөрөвдүгээр байр эзэлсэн “Winners-3” баг 499,999 төгрөгийн шагнал хүртлээ.

Мөн хэсгийн тоглолтонд үзүүлсэн хувийн дундаж онооны үзүүлэлтээр эрэгтэйчүүдээс “JA Bowling club”-ын тамирчин, спортын мастер Ш.Баатар тодорч 299,999 төгрөг, эмэгтэйчүүдээс “Big bowling” клубын тамирчин, дэд мастер Т.Нансалмаа шалгарч 399,999 төгрөгийн эзэн боллоо.

“Эв эеэ эрхэмлэж, эмэгтэйчүүдээ хүндэлье” уриатай тус тэмцээний ерөнхий ивээн тэтгэгчээр “DGH electronics” компани ажиллаж, шагналыг “JA Bowling club”-ын ерөнхийлөгч Д.Отгонжаргал гардуулан, тамирчдад амжилт хүссэн юм.

“JA Bowling club”-ынхэн нэрэмжит тэмцээнээ бүх тамирчин, багт боломж олгосон шинэлэг дүрмээр зохион байгуулсан нь оролцогчдын талархлыг хүлээсэн. Түүнчлэн тус клуб өргөмжлөл, цом, медалиа өмнө үзэгдээгүй загвараар хийж, тамирчдын бүх зардлыг даасан. Мөн арын албаныхныг ч урамшуулахаа мартсангүй. Монголд боулингийн спорт клубын системд шилжиж, өмнө нь “Strikes”, “Big bowling” клубууд нэрэмжит тэмцээнээ хийж байсан бол энэ удаа “JA Bowling club”-ынхэн тэмцээнээ ийнхүү амжилттай зохион байгууллаа.