1 мин

Хятадад гарсан Чингис хааны зурагтай архи зохиогчийн эрх зөрчсөн үү

Чингис хааны дүрийг бүтээсэн жүжигчин Эдуард Ондар "Найзууд минь энэ архины зургийг надад илгээж байгаа. Үзэх болгонд зүрх өвддөг" гэж ярьжээ.

М.Сугар-Эрдэнэ 2019.01.22

Хятадад ОХУ-ын Якутын "Тайна Чингис Хаана" буюу "Чингис хааны нууц" киноны гол баатар буюу Чингис хааны зурагтай архи гарсан нь якутчуудын уурыг хүргэжээ. Годон гутал, үндэсний гоёл чимэглэл гээд хятадуудын тэднээс хулгайлсан оюуны өмч олон бий. Тэгвэл үүн дээр якут кино нэмэгджээ.

"Чингис хааны нууц" киноны гол дүрд Тувагийн жүжигчин Эдуард Ондар тоглосон бөгөөд түүний дүрийг архинд "наасан" нь кино бүтээгчид, жүжигчин, студийн зохиогчийн эрхийг зөрчсөн эсэхийг Якутын хуульчид шалгаж байгаа гэнэ. Учир нь энэ киноны бүрэн эрхийг "Ургэл В" компани эзэмшдэг байна.
Киноны продюсер Владимир Иванов "Якутия 24" агентлагт ярилцлага өгөхдөө "Мэдээж сайхан санагдахгүй байна. Якутын Засгийн газар, продюсерууд маш их хөрөнгө мөнгө оруулж, хүч хөдөлмөр зарсан бүтээл шүү дээ. Оюуны өмчийг хүндэлдэг орчин үеийн улсад амьдарч байгаа юм бол бид киноныхоо ширхэг зургийг ч эзэмших эрхээ эдлэх ёстой" гэж хэлсэн байна.

Чингис хааны дүрийг бүтээсэн жүжигчин Эдуард Ондар "Найзууд минь энэ архины зургийг надад илгээж байгаа. Үзэх болгонд зүрх өвддөг. ОХУ-ын Оюуны өмчийн хууль тун сулхан, тааруу тул энэ асуудлыг Засгийн газар хооронд ярьж шийдэх ёстой" гэж ярьжээ.

Якутын хуульчдын үзэж байгаагаар Хятадын архины үйлдвэр зураг ашиглах зөвшөөрөл хүсээгүй, дур мэдэн аашилсан бол шүүхэд хандаж болох гэнэ. Энэ тохиолдолд 5 сая хүртэлх рублийн хохирол нэхэмжилж болох аж.