Усны пологийн тамирчид бассейнд зодолдов
Хөлбөмбөг, хоккей, сагсан бөмбөгийн тамирчид талбай дээр зодолдож байхыг бид олонтаа харсан. Харин усны пологийн тамирчдыг зодолдож байхыг харж байгаагүй.
ОХУ-ын Супер лигийн Казань хотын "Синтез", Волгоград хотын "Спартак" багуудын тоглолтын үеэр тамирчид бассейн дотор гар зөрүүлсэн юм. Хоёрдугаар байрны төлөө өрсөлдөж байгаа багууд тул тоглолт тун хатуу ширүүн, өрсөлдөөнтэй явагдсан.
Эхний тоглолтод 8:7 харьцаатай ялсан "Синтез" баг цаг дуусахаас 4 минутын өмнө 6:9 ялагдаж байлаа. Цагаа бариад дуусгахад "Спартак" бараг ялчихна.
Энэ үед зодоон эхэлсэн юм.
Сэлгээний тамирчид бассейнд үсрэн орж ирснээр зодоон улам өргөжсөн. Талбайн гадна хоёр дасгалжуулагч барилцаж авах тун дөхсөн ч шүүгч салгасан байна. Шүүгч нар тоглолтыг зогсоох шийдвэр гаргаснаар тоглолт дууссан. ОХУ-ын усны пологийн холбооноос тамирчдад ямар шийтгэл оноохоо хэлэлцэж байна.