1 мин

“Гүйж яваа эмэгтэй”

Монголын зуу зуун хүүхдийн даван туулсан мянга мянган амаргүй өдрүүдийн тухай энд өгүүлнэ

Б.Энхцэцэг 2019.03.18 7 4 1

260

“Хилийн чанадад ажиллаж амьдардаг эцэг эхээсээ хэдэн мянган бээрийн алсад үлдсэн ч өдөр, шөнө бүхэн сэтгэл зүрхэндээ тэдэнтэйгээ үргэлж хамт байдаг Монголын зуу зуун хүүхдэд энэхүү бүтээлээ зориулав” хэмээх эхлэлтэй зохиолч Х.Болор-Эрдэнийн “Гүйж яваа эмэгтэй” бэсрэг романд эгэл жирийн монгол охиноос Холливудад хүрч чадсан авьяаслаг уран нугараач охины туулж өнгөрүүлсэн ер бусын амьдралын түүхийг өгүүлнэ. Зохиогч бодит амьдралаас сэдэвлэсэн энэхүү романыхаа анхны уншигч-редактороор уран зохиолд дуртай 47 хүнийг сонгосон нь сонирхол татна. “Би ном бүтээл гэж гүйх завгүй зургаан жил явжээ. Тиймээс энэ урт хугацааны дараа гарч байгаа номондоо хатуу цензур тогтоохыг хүссэн юм” гэж “Гүйж яваа эмэгтэй” бэсрэг романы зохиогч Х.Болор-Эрдэнэ ярьлаа. 

Бодит хүний амьдралаас сэдэвлэн бичсэн энэхүү роман нь бүхэлдээ бодит үйл явдал, бодит хүмүүсийн дүр бус гэдгийг тэрээр бас онцлон сануулсан юм. Охины туулж өнгөрүүлсэн амьдралын дүр зураг эндээс харагдах боловч  зохиолч нэмэлт дүр, сонирхолтой үйл явдлуудаар зохиолоо илүү хүчтэй болгохыг зорьсон байна. Зохиол бичигдэх явцад үргэлж хамт байсан анхны уншигчдын зарим нь “Зохиолын гол баатар болон түүнийг тойрсон дүрүүдийн эрэлд гарч, өөрсдийн хэмжээнд судалж сурвалжилсаар жинхэнэ эздийг нь олж санаагаа амрааж байсан” гээд “Гүйж яваа эмэгтэй” номыг тойрсон олон хөгжилтэй явдлуудаа тэд өөр өөрсдийн Facebook хуудсандаа дурсжээ. МЗЭ-ийн шагналт зохиолч Х.Болор-Эрдэнэ нь тууж, өгүүллэгийн төрлөөр олон бүтээл бичсэн бөгөөд энэхүү ном нь түүний анхны бэсрэг роман юм. 

Б.Энхцэцэг 2019.03.18

260