1 мин

“Тендерийн” хуулийн 24 дэх өөрчлөлтийг дэмжлээ

Худалдан авах ажиллагааны газрыг сэргээнэ

Б.Энхцэцэг 2019.03.19

УИХ-ын Төсвийн байнгын хорооны өнөөдрийн хуралдаанаар Төрийн болон орон нутгийн өмчийн хөрөнгөөр бараа ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төслийг хэлэлцэж дэмжлээ. Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай хуульд нийт 23 удаа нэмэлт, өөрчлөлт оруулж байсан бөгөөд энэ удаад 24 дэх нь болж буй.

Энэ төслөөр төрийн болон орон нутгийн өмчийн хөрөнгөөр бараа ажил, үйлчилгээ худалдан авах ажиллагааны тусгай агентлагтай боллоо. Яам, агентлагууд бодлого гаргах биш тендер зохион байгуулах ажилд ихэнх цагаа зарцуулдаг болсон учраас Худалдан авах ажиллагааны газрыг эргэн сэргээх зайлшгүй шаардлага тулгарсан байна.

Тендерт ялагдсан компани нь шүүхдэж, төрийн худалдан авах ажиллагааг гацаадаг байдал нийтлэг болсон учраас хэрэв тендерт оролцсон компани маргаан үүсгэхээр бол тендерийн үнэлгээний нэг хувьтай тэнцэх хэмжээний мөнгийг байршуулах зэрэг хариуцлагын асуудлыг нэмэлт, өөрчлөлтийн төсөлд тусгав.

Түүнээс гадна хуульд дотоодын худалдан авалтыг тусгайлан оруулж байгаагаараа онцлог болжээ.