Х.Баттулга, У.Хүрэлсүх нар томилгоонд тохиролцжээ
Зэвсэгт хүчний жанжин штабын даргыг УИХ-тай зөвшилцөж томилох Зэвсэгт хүчний тухай хуулийн дагуу Ерөнхийлөгч Х.Баттулга хошууч генерал А.Ганбатыг ЗХЖШ-ын даргаар томилох саналаа УИХ-д хүргүүлснээс хойш сар гаруйн хугацаа өнгөрөөд байна. УИХ-ын ээлжит бус чуулганаар эл томилгоог шийдэх хүлээлт МАН-ын бүлэг тохироонд хүрч чадаагүйгээс үүсээд байгаа билээ.
Бидэнд ирсэн мэдээллээр, МАН-ын дарга, Ерөнхий сайд У.Хүрэлсүх УИХ дахь бүлэгтээ А.Ганбат генералыг ЗХЖШ-ын даргаар батлах чиглэл өгсөн аж. Ийнхүү удаан хугацаанд удирдлага нь эзгүй байсан ЗХЖШ-ын даргын албыг Ерөнхийлөгч Х.Баттулгын санал болгосноор УИХ ирэх долоо хоногт багтан томилохоор МАН тохиролцоонд хүрчээ.
ЗХЖШ-ын даргын томилгоотой зэрэгцэн АТГ-ын дарга, дэд даргыг шинээр томилох асуудал УИХ-аар орох болж байна. МАН-ын бүлэг АТГ-ын даргаар ҮАБЗ-ийн ажлын албаны дарга Д.Даваа-Очир, дэд даргаар ШШГЕГ-ын дэд дарга асан, хурандаа Ж.Батсайханыг томилуулах Ерөнхийлөгч Х.Баттулгын саналыг дэмжихээр тохиролцсон байна. Сонирхуулахад, Ерөнхийлөгч Х.Баттулга одоогоос жил гаруйн өмнө буюу өнгөрсөн оны тавдугаар сарын 3-нд эл хоёр эрхмийн нэрийг УИХ-д өргөн барьсан билээ.
Харин Улсын ерөнхий прокурорын орлогчоор Сонгинохайрхан дүүргийн прокурорын газрын ерөнхий прокурор, хууль цаазын шадар зөвлөх Ш.Эрдэнэбилэгийг томилох саналаа Ерөнхийлөгч УИХ-д ирүүлсэн гэх мэдээлэл байна.