6 мин

Алдар хүндийн сүүдэрт шаналах K-Pop ертөнц

Ж.Мөнхзул 2019.11.25 205 16 12

3057

Өнгөрсөн сард Өмнөд Солонгосын дуучин, жүжигчин, модель Чой Жин Ри буюу Сулли 25 насандаа амиа егүүтгэсэн цочирдом мэдээ K-Pop ертөнцийг доргиосон. Өнөө өглөө түүний сайн найз дуучин Гү Хара гэртээ амиа алдсан байдалтай олдсон мэдээ дэлхийн хэвлэлүүдээр цацагдлаа. Үхлийн шалтгаааныг эхний байдлаар амиа хорлолт хэмээн үзэж буй аж. Тэрээр тав дугаар сард амиа хорлохыг завдсны улмаас эмнэлэгт хэвтэн, сэтгэл заслын эмчилгээ хийлгэж байгаад ердөө өнгөрсөн долоо хоногт хөгжмийн ертөнцөд эргэн ирснээ зарлаж, фэнүүдийнхээ санааг зовоосондоо хүлцэл өчөөд, бүх юм ард хоцорсон хэмээж байсан юм. Бямба гарагийн орой тэр өөрийн 1.5 сая дагагчтай Инстаграм хуудаснаа зургаа оруулж “Сайхан амраарай” гэж бичсэн нь түүний хамгийн сүүлийн сошиал пост байлаа. 

Дуучин Сулли нас барсны дараа Солонгосын поп хөгжмийн ертөнц хүчтэй шүүмжлэлд өртөж, дарамт, айдас ихтэй энэ салбар шүтэн бишрэгчдийн хэт улайрсан хандлагаас дуучдаа хамгаалж чадахгүй байна хэмээн буруутгагдаж байлаа. Нас барахынхаа өмнө Сулли online bullying буюу цахим орчны үзэн ядалт, фенүүдийн доромж сэтгэгдлүүдээс болж хүнд хэлбэрийн сэтгэл гутралд орсон ба энэ асуудлаа өөрийн агентлагт удаа дараа тавьж, онлайн дарамтын эсрэг арга хэмжээ авч өгөөч гэж хүссэн байдаг. Мөн өөрийн сэтгэл зүйн хэвийн бус байдлын тухай олон нийтэд нээлттэй ярьж байсан ч алдар хүндийн шаналалаас өөрийгөө аварч чадаагүй юм. Түүний үхлийн дараа кибер орчин дахь үзэн ядалтын сэтгэгдлүүдийн эсрэг арга хэмжээ авах болон уран бүтээлчдийн сэтгэл зүйн эрүүл мэндэд санаа тавьж, дэмжих тухай асуудал нийгэмд идэвхтэй яригдаж байсан ч өөр нэгэн дуучин бүсгүйг аварч амжилгүй явууллаа. 

 Сулли, Гү Хара

Гуардиан сайт тухайн үед “Өмнөд Солонгосын эмэгтэй дуучид, жүжигчид онлайн үзэн ядалтад өртөж, ямарваа нийгмийн норм, хүлээлтэд нийцээгүйнхээ төлөө хэн нь үл мэдэгдэх сая сая шүтэн бишрэгчдийн зүгээс сүрдүүлэг, дарамт мэдрэх явдал ихссэний нэг жишээ Сулли юм.” гэж бичжээ. Жишээлбэл тэрээр нэгэн удаа сошиал орчинд  Live streaming буюу шууд дамжуулалттай видео хийх үедээ цээживчгүйгээр цамц өмссөн байсан нь, мөн найзуудтайгаа согтууруулах ундаа хэрэглэж байсан нь түүнийг дараагийн хэдэн сард тасралтгүй үзэн ядаж, шүүмжлэх шалтгаан болж. Ер нь эмэгтэй уран бүтээлчдийн үйлдэл бүрийг хянаж цагдаж, шүүмжилж, гадаад төрхийг өөрсдийн хүссэнээр байхыг шаарддаг нь зарим оронд түгээмэл үзэгдэл юм. Сулли нэгэнтээ телевизийн нэвтрүүлгийн үеэр Солонгос шиг сэтгэцийн эрүүл мэндийн асуудлыг хайхардаггүй оронд, сая сая онлайн үзэн ядагчтай байх нь түүнд хэрхэн зовнил, олон нийтээс жийрхэх сэтгэл төрүүлдэг тухай ч ярьж байж.  Эндээс K-Pop ертөнц ямархан өршөөл энэрэлгүй, залуу, эмэгтэй уран бүтээлчдэд халтай болон Солонгосын нийгэм жендерийн асуудал дээр хичнээн хаалттай орон болохыг харж болно. Зарим талаараа хүйсийн алагчлал, зарим талаараа онлайн дарамттай холбоотой түүний үхэл Солонгосын энтертайнмент ертөнцийн сүүлчийн золиос байгаасай гэж хүссэн ч тийм байсангүй. 

Нөгөөтэйгүүр зөвхөн хүйсийн норматив үзлээс ч бус уран бүтээлчид ерөнхийдөө л хичнээн дарамттай, өрсөлдөөнтэй нөхцөлд ажиллаж, сэтгэл гутралд орж болдгийн жишээг 2017 онд Shinee хамтлагийн гоцлол дуучин агсан Ким Жон Хюн амиа хорлосон явдлаас харж болно. Тэрээр гэрээслэлдээ маш их ганцаардаж, дотроосоо нуран унаж буйгаа дурдаад, энэ амьдралаа эцэслэх нь хамгийн зөв сонголт байсныг тайлбарлажээ. Түүний үхлийн дараа зөвхөн шоу бизнесийн ертөнц ч бус Өмнөд Солонгосын нийгэм, боловсролын тогтолцооны халширмаар өрсөлдөөнт байдал, түүнээс үүсэх дарамт ачаалал хэрхэн корпорейт соёлд нөлөөлж буй тухай асуудал босч ирж байв. 

Ким Жон Хюн

2009 оны судалгаагаар Солонгосын энтертайнмент оддын 40 хувь нь ямар нэг байдлаар амиа хорлох тухай бодож үзэж байсан тухай тоо баримт байна. Гол шалтгаанууд нь хувийн амьдралын орон зай үгүй болсон, цахим үзэн ядалтад өртсөн, тогтворгүй орлоготой, эсвэл авьяас чадварыг нь хүмүүс үнэлэхгүй байх вий гэх айдастай зэргийг онцолжээ. Солонгос улс амиа хорлолтын өндөр үзүүлэлттэй орон болсон нь энэ мэт хүчин зүйлсээс шалтгаалж байна. Сүүлийн арав гаран жилд амиа егүүтгэсэн оддын тоо арав давж, тэр дундаа 2017-2019 он залуу уран бүтээлчдийн хувьд харуусалт жилүүд болж өнгөрч байна. 

Гү Харагийн хувьд хуучин найз залуу нь түүний хувийн шинжтэй зургуудыг олон нийтэд дэлгэж, урлагийн карьерыг нь эцэс болгоно хэмээх сүрдүүлснээр түүний асуудлууд эхэлсэн байдаг. Сүрдүүлгэд автсан түүний энэ бүх хувийн харилцаа олон нийтийн анхааралд өртөж, cyber bullying буюу интернет дарамт, доромжлолд өртөж эхэлснээр сэтгэл зүйн гүн хямралд оржээ. Энэ мэт оддын нас баралтын шалтгаан хэдийгээр алдартнуудын төвөгтэй амьдралын олон комплекс хүчин зүйлсээс шалтгаалж буй боловч хамгийн их дурдагдаж буй асуудал интернет орчны үзэн ядалт, дээрэлхэлт, доромжлол юм. 

Сөүлийн Ионсей их сургуулийн профессор И Донг Гви өгүүлэхдээ “Үзэл бодлоо чөлөөтэй илэрхийлэх нь эрх чөлөөний үндсэн ойлголт боловч бусдын эрхэм чанарыг гутаан доромжлох нь хязгаартай байх ёстой. Энэ хязгаарыг давбал хуулийн дагуу шийтгэл хүлээдэг болох нь зүй.” гэв. Өмнөд Солонгост ажлын байрны ялгаварлан гадуурхалт, сэтгэл зүйн дарамтын эсрэг хууль батлан хэрэгжүүлсэн. Үүн шиг зохицуулалт интернет орчинд хэрэгтэй байгааг дээрх явдлууд харуулж байна. Ертөнцийн хаана ч гэсэн сошиал орчин л оршиж байвал ботууд, троллууд ажиллаж, мэдээ мэдээллийг гажуудуулах үзэгдэл дэлгэрээд байгаа нь үнэн. Нэр нүүрээ нуусан бодит бус хаягаас сөрөг сэтгэгдэл олноор үйлдвэрлэж, нийгмийн сэтгэл зүйг дэнсэлгэж байдаг нь бас үнэн. Иймээс сэтгэгдэл үлдээгчид нэр нүүрээ ил тод тавьсан байхыг энэ төрлийн харилцааны орчинд журамлах хууль тогтоомжийг Солонгост санаачилж эхэлсэн. Зарим сошиал платформ үзэн ядсан сэтгэгдлүүдийг нийтлэхгүй байх арга хэмжээ авч байна. 

Дэлхий ертөнц таныг алдартан эсэхээс үл хамааран хувийн мэдээлэл, орон зайг тань олон нийттэй хуваалцаж, алхам бүрийг тань бүртгэн хянаж байдаг дижитал мэдээллийн системд зугуухан шилжиж байна. Ийм нийгэмд хэн хүнгүй хувийн мэдээллээ хямгадаж, сошиал хүрээллээ анхаарч, нийгмийн зүгээс ирэх аливаа дарамтад үл автахад суралцах шаардлагатай болж буй нь зайлшгүй тохиох нийгмийн эволюц юм. Өсвөр насныхан, залуу үеийнхнийг цахим орчин дахь ялгаварлал, дарамтаас хамгаалах бодлого хэрэгтэйг ч дурдахын хэрэг юун.  

Дэлхий даяар олон зуун сая фентэй K-Pop гүрэн шүтэн бишрэгчдийнхээ гайхал бишрэлд живж, оддын амьдрал нь дэлхийгээс тасарч, олон мянган хүүхэд залуучууд чухам тэдэн шиг алдар хүндэд хүрэхийг мөрөөдөж буй ч хаалганы цаана ийм гунигт дүр төрх ноёлж байна. Завсар чөлөөгүй бэлтгэл сургуулилт, цаг наргүй тоглолтын хуваариуд, хувийн эрх чөлөө, орон зайг нь хайр найргүй түрэмгийлсэн урлагийн ертөнц, улайран хуйлрах галзуурсан тэнгис мэт шүтэн бишрэгчид, нэг л орчихвол гарч чадахгүй давалгаалах ертөнц, нэр алдрын савраас аврагдаж чадалгүй үлдэх алдартнууд. Бас цахим үзэн ядалт. 

Ж.Мөнхзул 2019.11.25

3057