Женнифер Лопес, Карди Би нарын тоглосон 'Hustlers' киноны трейлер цацагдлаа
STX Entertainment компани Холливуудын үзэсгэлэнтэй, алдартай долоон бүсгүйг оролцуулан тоглуулсан "Hustlers" киноны анхны бүрэн хэмжээний трейлерийг цацлаа. Киноны гол дүрийг реппер Карди Би, "Галзуу баян азиуд" киногоороо танигдсан жүжигчин Констанс Ву, түүнчлэн алдарт жүжигчин Женнифер Лопес, Жулия Стайлз, Кеке Палмер, Лили Рейнхарт, Лиззо нар тогложээ.
Кинонд өмнө нь тайчигч клубт ажилладаг байсан долоон бүсгүй хэрхэн Уолл Стритэд хөл тавьж, нөлөө бүхий үйлчлүүлэгчидтэй болж байгаа талаар өгүүлэх аж. "Hustlers" киног 2015 онд Нью-Йорк сэтгүүлд хэвлэгдсэн “The Hustlers at Scores” нийтлэлээс сэдэвлэн бүтээжээ.
Нийтлэлд Hustler хэмээх шөнийн клубт ажилладаг байсан Роселин Кео хэмээх эмэгтэйн тухай гардаг. Тэрээр ажилгүй болсныхоо дараа шөнийн клубт бүжиглэх болж, өөр хэд хэдэн бүсгүйчүүдийн хамт Саманта Фокс хэмээх эмэгтэйн удирдлага дор Уолл Стритийн хөрөнгө чинээтэй эрчүүдэд үйлчилдэг байжээ. Тэд чинээлэг боловч хүн чанаргүй, "муу" эрчүүдийг мансууруулж, биеэ хянах чадваргүй болгоод эцэст нь кредит картаас нь их хэмжээний мөнгө авдаг байсан тухай нийтлэлд дурджээ. Тухайн үед уг нийтлэл ихээхэн шуугиан тарьж, нийтлэлд дурдагдсан эмэгтэйчүүд удалгүй баривчлагдаж байжээ.
Шөнийн клубт ажилладаг байсан долоон бүсгүйн ээдрээтэй амьдрал, эрсдэлтэй сонголтын талаар өгүүлэх эл бүтээл ирэх есдүгээр сарын 13-нд нээлтээ хийх юм байна.