Кэндалл Жэннэр дүүгээсээ урам зориг авч, гоо сайхны бизнест хөл тавихаар шийджээ
Загвар өмсөгч, Америкийн реалити шоуны од Кэндалл Жэннэр өөрийн нэрийн цуврал сүрчиг гаргахаар болсон тухай Blast сайт мэдээлжээ. Тэрээр "Kendall Jenner", "Kendall" брэндийн барааны тэмдэгтийг авахаар бичиг баримтаа бүрдүүлж эхлээд байгаа гэнэ.
"Эдүгээ 23 настай загвар өмсөгч бүсгүй эгч, дүү нартайгаа адилхан гоо сайхны бүтээгдэхүүнд дурладаг бөгөөд дүү Кайли Женнэрийнх нь амжилт түүнд урам зориг өгсөн. Нөгөөтэйгүүр Кэндалл гоо сайхны бизнест хөл тавих нь цаг хугацааны л асуудал байсан" гэж тус сайт мэдээлжээ.
Дашрамд дурдахад, Кардашьяны гэр бүлийн бүсгүйчүүд бараг бүгд хувийн бизнестэй бөгөөд дийлэнх нь гоо сайхны салбарт харьяалагддаг билээ. Тухайлбал, Кайли Женнэрийн 2015 онд үүсгэн байгуулсан Kylie Cosmetics компанийн зах зээлийн үнэлгээ одоогоор 900 сая долларт хүрээд байгаа ба Форбес сэтгүүл түүнийг хамгийн залуудаа өөрийн хүчээр тэрбумтан болсон хүнээр нэрлэжээ. Мөн эгч Ким Кардашьян нь "KKW Beauty" нэртэй гоо сайхны брэндийг, Хлои Кардашян "Good American" хэмээх жинсэн өмдний брэндийг тус тус үүсгэн байгуулжээ.
Эх сурвалж: The Blast