1 мин

Хараагүй эхнэрээ баярлуулахын тулд 2 жилийн турш мянга мянган цэцэг тарьжээ

О.Анхзаяа 2019.11.14

Улаан сарнай "Би чамд хайртай" гэх үгийн илэрхийлэл болдог гэдэг. Харин мянга гаруй ягаан цэцгээр дүүрэн цэцэрлэг энэ үгийг мянгантаа хэлэх мэт тийм их сэтгэлийн илэрхийлэл болох биз ээ.

Шинтоми гэх нэгэн фермд ноён, хатагтай Күроки нар аж төрөн суудаг байна. Тэд 1956 онд гэрлэж, тэр үеэс хойш тасралтгүй хамтдаа амьдарч, аз жаргалаар дүүрэн өдөр хоногуудыг өнгөрүүлжээ. Гэвч 52 настай байхдаа эхнэр нь чихрийн шижингээс болоод хараагаа бүрэн алдсан байна.

Фермдээ ажиллахаа больж, яваандаа гэрээсээ ч гарахаа болин, улам бүр өөрийгөө тусгаарлаж эхлэх болжээ. Түүн дээр зочлон ирэх хүмүүсийн тоо ч багассан тул нөхөр нь яаж түүнийг илүү жаргалтай байлгаж, эхнэр дээр нь олон хүн ирж уулздаг болгох вэ гэж бодож эхэлжээ.

Тэр үед анх цэцэрлэгт нь ягаан шибазакүра цэцэг ургаж байхыг анзаарч гэнэ. Зөвхөн маш үзэсгэлэнтэй харагдаад зогсохгүй, хамар цоргим сайхан үнэртэй байж гэнэ.

Тэр үеэс хойш нөхөр нь 2 жилийн турш байшингийнхаа эргэн тойронд мянга мянган цэцэг тарьж эхэлжээ. Аажим аажмаар эхнэр нь байшингаасаа гарах болж, цэцэгсийн сайхан үнэрийг мэдрэхийн тулд цэцэрлэг рүү явдаг болжээ.

Удалгүй эхнэртээ зориулж тарьсан цэцгүүд нь гаднын зочдын зорьж ирэх газруудын нэг болон хувирсан байна. Хаврын цагаар 7,000 гаруй цэцэг дэлгэрч, сайхан үнэрээ түгээдэг гэнэ.