Хэнтий аймгаас 30 жилийн дараа аварга цолтон төрлөө
Тулгар Төрийн 2228, Их Монгол Улс байгуулагдсаны 813, Ардын хувьсгалын 98 жилийн ой, Үндэсний их баяр наадмын хүчит бөхийн барилдаанд улсын арслан Энхтөгсийн Оюунболд улсын аварга Н.Батсууриар ес даван түрүүлж Монгол Улсын аварга цолны болзол хангалаа.
Тэрбээр тавын даваанд аймгийн арслан Н.Мустафаг, зургаагийн даваанд начин цолны болзол хангасан Б.Цэдэнсодномыг, долоогийн даваанд улсын харцага цолны болзол хангасан Д.Анарыг, наймын даваанд улсын арслан Ц.Содномдоржийг тус тус өвдөг шороодуулсан юм. Харин үзүүрлэсэн улсын аварга Н.Батсуурь тавын даваанд улсын начин Б.Ганхуягийг, зургаагийн даваанд улсын начин цолны болзол хангасан Ж.Ням-Эрдэнийг, долоогийн даваанд улсын аварга Б.Мөнхбатыг, наймын даваанд улсын гарьд Б.Гончигдамбыг тус тус өвдөг шороодуулсан билээ.
Ийнхүү Хэнтий аймгаас 30 жилийн дараа Монгол Улсын аварга цолтон төрлөө.
Бэлтгэсэн:Л.Сайнбаяр