Хэрэглэгчдийн хамгийн итгэдэг сошиал медиагаар Линкедин тодорчээ
Шалгуур өндөртэй, мэргэжлийн орчин
Business Insider Intelligence саяхан 2018 оны Дижитал Итгэлцлийн Тайланг гаргасан байна. Үүнд хүмүүсийн хамгийн түгээмэл ашигладаг Facebook, Twitter, Snapchat, Instagram, LinkedIn, YouTube гэсэн зургаан сошиал медиа платформыг хамруулжээ. Ингэхдээ хэрэглэгчид дээрх платформуудын аюулгүй байдал, үйл ажиллагааны бодлого, хэрэглэгчийн туршлага, бусадтай хуваалцах, түгээх байдал, харилцан хамаарал зэрэгт үнэлгээ өгөх замаар Дижитал итгэлцлийг гаргаж ирсэн байна.
Судалгаанд дэлхийн өнцөг булан бүрт амьдарч буй 1300 орчим хэрэглэгчийг хамруулжээ. Үр дүнгээс харахад хэрэглэгчдийн 54 хувь нь сошиал медиагаар түгээгдэж буй төлбөртэй зар сурталчилгаа, контенттой холбоотой аливаа шийдвэр гаргахад хуурамч мэдээ маш их нөлөөлж байна гэж хариулжээ. Түүнчлэн хэрэглэгчдийн хамгийн их итгэдэг сошиал медиагаар Линкедин тодорчээ.
Линкединийг мэргэжлийн хүмүүстэй холбоо тогтоох орон зай гэж үздэг учраас хүмүүс илүү цензуртэй хандаж, хувийн мэдээллээ бага хуваалцдаг аж. Түүнчлэн Линкединд мэргэжилтэн, байгууллагууд гол төлөв контент, мэдээлэл нийтэлдэг тул хэрэглэгчдийн итгэлийг хүлээдэг байна. Мөн бусад сошиал медиатай харьцуулахад шалгуур өндөртэй байдаг зэрэг нь хэрэглэгчид Линкединд итгэл хүлээлгэх шалтгаан болжээ.