Хонконгийн цагдаа нар жагсагчдын эсрэг гал нээж, 36 хүнийг баривчилжээ
Хонконг дахь нөхцөл байдал хурцдаж, жагсагчид болон цагдаа нарын хооронд дахин мөргөлдөөн гарчээ. Өнгөрсөн хугацаанд цагдаа нар тэмцэгчдийн эсрэг нулимс асгаруулагч хий, резинэн сум ашиглаж байсан бол амралтын өдрүүдэд болсон жагсаалын үеэр анх удаа галт зэвсэг, усан буу хэрэглэхэд хүрчээ.
Ням гарагт болсон жагсаал Цуен Ван дүүргээс эхэлж Цим Ша Цуй дүүрэг хүртэл тэлсэн бөгөөд жагсагчид цагдаа нарын эсрэг тоосго, галтай лонх шидэн эсэргүүцэл үзүүлжээ. Тэмцэгчдэд шахагдсан хүчнийхэн хий буудаж анхааруулга өгсөн байна.
Мөн Цагдаагийн газар өнөөдөр 29 эрэгтэй, долоон эмэгтэй нийт 36 хүнийг цагдаагийн алба хаагчдыг дайрч доромжилсон, нийгмийн тайван байдлыг алдагдуулах зэвсэг биедээ авч явсан, хууль бусаар жагсаал зохион байгуулсан гэсэн үндэслэлээр баривчилжээ. Баривчлагдсан иргэдийн хамгийн бага нь 12 настай хүүхэд байсан гэж Ройтерсоос мэдээлсэн байна.
Хонконгийн иргэд гэмт хэрэгт холбогдсон иргэдийг Хятадад шилжүүлж шүүлгэх хуулийн төслийг эсэргүүцэн өнгөрсөн зургаадугаар сарын 9-өөс эхлэн жагсаж эхэлсэн бөгөөд эдүгээ энэ нь Хонконгийн ардчилал, хараат бус байдлын төлөөх тэмцэл болон өргөжиж, гурав дахь сардаа үргэлжилж байна. Түүнчлэн цагдаагийнхан иргэдийн эсрэг хүч хэрэглэн, бэртээж гэмтээсэн нь жагсагчдын дургүйцлийг ихээхэн хүргэж, тэмцлийн хөдөлгөөнийг эрчимжүүлэхэд нөлөөлж байгаа аж.
Эх сурвалж: Reuters, AP