1 мин

Хөл хорионд орсон Ухань хотынхон бүх нийтээрээ амны хаалт зүүж байна

Б.Саруул 2020.01.24 2 1

88

ДЭМБ коронавирусийн голомт болох Ухань хотоос гарах бүх төрлийн нийтийн тээврийн хэрэгслийн урсгалыг зогсоогоод байгаа билээ. Халдварын дэгдэлт газар авч буйтай холбогдуулан Ухань хотын удирдлага лхагва гарагт захирамж гаргаж, бүх нийтээрээ амны хаалт зүүхийг үүрэг болгожээ. Мөн амны хаалт зүүгээгүй иргэдийг ресторан, зочид буудал, кино театр, үсчин гоо сайхан зэрэг үйлчилгээний газар луу орохыг хориглож байгаа аж. 

Шинэ захирамж гарсны дараа телевизийн нэвтрүүлэгчид хүртэл амны хаалт зүүн ажлаа явуулах болжээ. Маск зүүн мэдээ уншиж буй нэвтрүүлэгчдийн зураг Хятадын Weibo платформд вайрел болж байна. Учир нь, сэтгүүлчид хувийн эрүүл мэндээ хамгаалаад зогсохгүй олон нийтийг амны хаалт зүүхэд нөлөө үзүүлж байна гэж сошиал хэрэглэгчид бичжээ. 

Коронавирусийн дэгдэлттэй холбоотой сүүлийн үеийн мэдээллүүд: 

• Хятадын эрх баригчид Ухань хотоос гадна Хуанган, Эжоу, Чиби, Шянтао, Чянжянь, Зижянь, Личуань гэсэн долоон хотод хөл хорио тогтоолоо.
• BBC-ээс мэдээлснээр халдвар авсан хүний тоо 830, нас барагсдын тоо 25-д хүрчээ. 
• ДЭМБ коронавирусийн асуудлаар лхагва гарагт шуурхай хуралдаан хийжээ. Одоогийн байдлаар олон улсын хэмжээнд онц байдал зарлах шаардлагагүй гэж үзсэн байна. 
• Бээжин, Хонконгод болох гэж байсан томоохон арга хэмжээ, фестивалиудыг цуцаллаа. 
• Вьетнам, Сингапурт коронавирусийн анхны халдвар бүртгэгджээ. Ийнхүү АНУ, БНХАУ, Өмнөд Солонгос, Тайланд, Тайвань, Япон, Макао, Хонконг, Вьетнам, Сингапур гэсэн 10 улсад вирусийн халдвар илрээд байна. 

Б.Саруул 2020.01.24

88