Хүүхдээ алдсан бүсгүй "Хаан ширээний тоглоом" цувралын тусламжтайгаар хүнд үеийг даван туулж, дахин хүүхэдтэй болжээ
"Хаан ширээний тоглоом" цуврал сая сая үзэгчдийг байлдан дагуулаад зогсохгүй зарим фэнийхээ амьдралд чухал нөлөө үзүүлжээ. Тухайлбал, тус цувралын үнэнч шүтэн бишрэгчдийн нэг Кэтрин Акоста "Хаан ширээний тоглоом" цуврал түүний амьдралд ямар өөрчлөлт авчирсан талаар хуваалцсан байна.
Кэтрин 2017 онд үр зулбаж, хүнд үеийг даван туулж байх үеэр найз нь "Хаан ширээний тоглоом" цувралыг үзэхийг санал болгосон аж. Тэрээр үзэж эхлээд л цувралын улаан фэн болсон бөгөөд долоон бүлгийг хоёр ч удаа давтаж үзсэн гэж Нью-Йорк Таймст өгсөн ярилцлагадаа дурджээ.
Удалгүй Кэтриний сэтгэл санаа ч дээрдэж, дахин жирэмслэсэн бөгөөд эмчид үзүүлтэл хоёр ихэр хүүхэд тээж буйг нь дуулгажээ. Тэрээр нөхөртэйгээ ярилцаж хоёр ихрийнхээ охинд нь Калисей (дотраки хэлээр 'хатан' гэсэн утгатай), хүүд нь Рубен Рубио хэмээх нэр өгөхөөр төлөвлөж байв. Кэтрин 2018 оны гуравдугаар сарын 18-нд буюу амаржих ёстой өдрөөс хоёр сарын өмнө төрсөн ба хүү нь энджээ. Харин Калисей нэртэй бяцхан охин хоёр долоо хоногийн турш эрчимт эмчилгээний тасагт эмчлүүлсний эцэст ээж, аав дээрээ ирсэн байна.
Эрчимт эмчилгээний тасгийн ажилчид дунд ч "Хаан ширээний тоглоом" цувралын үнэнч үзэгчид байсан гэнэ. Тэд охины гаранд Дейенерис Таргариен гэсэн нэртэй тусгай тэмдгийг зүүж өгчээ.
"Охиндоо энэ нэрийг өгөхөөр болсноо дуулгахад хүмүүс яг солиотой хүн рүү харж байгаа юм шиг над руу ширтсэн. Гэхдээ надад энэ хамаагүй ээ. Калисей Акоста гэж гайхалтай сонсголонтой нэр" гэж Кэтрин ярьсан байна.
Сонирхуулахад, "Хаан ширээний тоглоом" цувралын баатруудын нэрсийг хүүхдэдээ өгөх нь нэмэгдэж буй талаар Нью-Йорк Таймс мэдээлсэн байна. 2017 онд л гэхэд шинээр төрсөн 446 хүүхдэд Калисей, 2156 хүүхдэд Арьяа гэж нэр өгчээ. Мөн Калисей хэмээх нэр нь АНУ дахь хамгийн түгээмэл нэрсийн 630-д, Арьяа нь 135-д (2017 онд) тус тус бичигдэж байна.
Эх сурвалж: Parents.com
Яг одоо #GOT Бүлэг 8-ыг LookTV-ээр үзээрэй. HBO багц идэвхжүүлэхэд Бүтэн сарын турш ердөө 4’950₮.