1 мин

Хүүхдээ үе тэнгийнхний дарамтаас хамгаалахын тулд өдрийн 450 доллараар хуурамч "авга ах" хөлсөлж байна

Ub.life 2019.07.23 21 19 15

1061

Өмнөд Солонгост сургуулийн насны хүүхдүүд бие биенээ дээрэлхэж, дарамталсан хэрэг түгээмэл гардаг аж. Үүнээс үүдэн амиа егүүтгэж буй хүүхдүүдийн тоо жил ирэх тусам нэмэгдэх хандлагатай байгаа нь эцэг эхчүүдийн санааг зовоож байна. Харин сургуулийн орчин дахь дээрэлхэлт, гадуурхалаас хамгаалах зорилготой шинэ төрлийн үйлчилгээ сүүлийн үед идэвхжиж байгаа гэнэ. 

Тодруулбал, том биетэй, догшин төрхтэй залуусыг сурагчдын "авга ах"-ын дүрд тоглуулж, бусдад дээрэлхүүлэхээс нь хамгаалах үйлчилгээ тун эрэлттэй байгаа аж. Уг үйлчилгээний төлбөр нь өдрийн 450-1790 орчим долларын үнэтэй байдаг байна. 

Сургуулийн орчинд дарамт шахалтад өртдөг сурагчдын ихэнх нь хүнд хэлж чадалгүй явсаар сэтгэлзүйн хямралд өртөх, сурлага нь муудах, бүр цаашилбал амиа хорлох хэмжээнд хүртэл даамжирдаг байна. Харин "Авга ахын үйлчилгээ" бий болсноор эерэг үр дагаврууд гарч эхэлсэн бөгөөд нэгэн сурагч "Биеэрээ дүүрэн шивээстэй, булчин шөрмөс болсон түүнийг хараад намайг дээрэлхдэг байсан хүүхдүүд надаас уучлалт гуйж, дахиж дарамтлахаа больсон" хэмээн ярьжээ. 

Дашрамд дурдахад, бусдыгаа гадуурхах, дарамтлах үзэгдэл зөвхөн ахлах сурагчдын дунд бус ажлын байранд ч түгээмэл байдаг байна. 2017 онд Өмнөд Солонгосын Хүний эрхийн үндэсний комиссоос гаргасан тайланд дурдсанаар нийт ажилчдын 70 орчим хувь нь ажлын байран дээрээ хамт олон болон ахлах ажилтныхаа дарамт, доромжлолд өртдөг гэж хариулжээ. Саяхан үүнтэй холбоотойгоор тус улсын хууль тогтоогчид шинэ хууль хэрэгжүүлж эхэлсэн бөгөөд ажлын орчинд дарамт үзүүлсэн этгээдийг 30 сая воноор (25 мянга орчим доллар) торгох эсвэл 3 хүртэлх жилийн хорих ялаар шийтгэх заалт оруулаад байна. 

Бэлтгэсэн С.Содбилгүүн

Ub.life 2019.07.23

1061