Ким Кардашьян Инстаграмдаа нэг пост оруулсныхаа төлөө 300-500 мянган долларын төлбөр авдаг
Реалитай шоуны од Ким Кардашьянтай хамтран ажиллахын тулд бизнесийнхэн хэр их мөнгө зарцуулдаг нь түүний саяхан гаргасан шүүхийн нэхэмжлэлийн материалаас ил болжээ.
Кардашьян өнгөрсөн хоёрдугаар сард өөрийн эзэмшлийн "Kimsaprincess" компанийн нэрийн өмнөөс "Missguided" фаст фэшн брэндийн эсрэг гомдол гаргаж, 10 сая доллар нэхэмжилсэн байна. Тус брэнд өөрийнх нь имиж, гадна төрхийг хууль бусаар ашигласан гэж Кардашьян үзэж байгаа аж.
"Missguided" брэнд олны танил хүмүүсийн өмсдөг хувцаснуудын дуураймал, хямд хувилбарыг гаргадгаараа танигджээ. Уг брэнд Ким Кардашьяний алтлаг өнгийн даашинзтай зургийг компанийнхаа вэб хуудас болон сошиал медиад байршуулж, дуураймал загварыг нь худалдаанд гаргасан аж.
Кардашьян үүнийг хууль бус гэж үзсэн бөгөөд үүнтэй төстэй ажил дээр хэдэн зуун мянган доллараар хэмжигдэх төлбөр авдаг гэж шүүхэд мэдүүлжээ. Харин өнгөрсөн тавдугаар сард түүний шүүхэд гаргасан өргөдөл ил болсон юм. Уг материалд дурдсанаар Кардашьян өөрт таалагдсан компанийн бүтээгдэхүүний постыг Инстаграмдаа оруулахдаа 300-500 мянган долларын төлбөр авдаг гэсэн байна.
Түүнчлэн Кардашьян компаниудтай урт хугацаагаар хамтран ажиллахаар болвол хэдэн сая доллараар хэмжигдэх гэрээ байгуулж, тусгай зөвшөөрлийн лиценз олгодог гэж Кардашьяний зөвлөх Тодд Вилсон мэдээлжээ. Энэ тохиолдолд тухайн компани Кардашьяний нэр болон гадаад дүрх төрх, имижийг бүтээгдэхүүний сурталчилгаандаа албан ёсоор ашиглах эрхтэй болдог аж.
Эх сурвалж: Business Insider