2 мин

Монгол боловсон хүчний өрсөлдөх чадвар 141 орноос 139 дүгээрт эрэмбэлэгдэж байна

Ж.Мөнхзул 2020.01.15 14 4 2

1670

Монгол Улсын боловсролын салбарыг шинэчлэх зорилготой “Боловсролын Реформ Хөдөлгөөн” ТББ-ынхан өнөөдөр хэвлэлийн хурал хийлээ. 2019 оны судалгаагаар монголчууд амжиргааны дорой байдал, ажилгүйдэл, боловсролын чанар гэсэн гурван асуудалд хамгийн их санаа зовж буй дүгнэлт гарсныг тэд танилцуулсан юм. Ядуурал, ажилгүйдэл, эдийн засгийн доройтол, нийгэм дэх баян хоосны ялгаа зэрэг олон асуудлыг шийдвэрлэх гарц нь боловсролын реформ болох тул нэн яаралтай хийж эхлэх чухал ажил хэмээн үзэж, мэргэжилтэн судлаачид хамтран энэ ТББ-ыг байгуулсан байна. 

Боловсролын үнэлгээний төвийн судалгаа дүгнэлтийг үндэслэн харахад дунд сургуулийн сурагчдын сурлагын үзүүлэлт, шалгалтын оноо түүхэн доод хэмжээнд хүрсэн ба 2018 оны байдлаар 12 дугаар ангийн сурагчдын математикийн хичээлийн дүнгийн үзүүлэлт дунджаар 27.5 хувь, монгол хэл 53 хувь, гадаад хэлний дүн 46 хувьтай байгаа нь нийт 100 онооноос тооцоход туйлын хангалтгүй юм. Энэ мэдээлэл тэр бүр ил тод байдаггүй тул эцэг эх, боловсролын байгууллагууд, бодлого боловсруулагчид бүрэн мэдээлэл авч чадахгүй, цаашид яах вэ гэдгийг хэлэлцэхгүй, хүүхдийн боловсролын асуудалд нийтээрээ хайнга хандах шалтгаан болж байна гэлээ. 

Түүнчлэн монгол хүний дэлхийд өрсөлдөх чадвар 141 орноос 139-т эрэмбэлэгдэж, боловсролын чанарын үзүүлэлт 2017 оны байдлаар 181 орноос 101-т жагсаж буй зэрэг нь боловсролын салбарт ямар их анхаарал дутагдаж буйг илтгэж байна. Тус хөдөлгөөнийхөн цаашид салбарын үйл ажиллагаанд даацтай судалгаа хийж, нээлттэй хэлэлцүүлгүүд өрнүүлэх аж. ШУТИС-ийн ТУЗ-ийн дарга, доктор, профессор  Д.Бадарч,  МУБИС-ийн ректор асан  Б.Жадамба, боловсрол судлалын магистр Г.Орхон, З.Энхмөнх, эдийн засагч Ө.Ганзориг, сэтгүүлч, редактор Ч.Болортуяа нар санаачлан эхлүүлсэн тус хөдөлгөөн дараах 6 стратегийг баримтлан ажиллах гэнэ. 

Үүнд:

1. Боловсролын салбарыг улс төрөөс ангид байлгах 
2. Үнэт зүйлд тулгуурласан, сэтгэлзүйд суурилсан боловсролыг хөгжүүлэх
3. Дижитал суурьтай боловсрол олгох
4. Тооноос чанарт шилжих бус, тоо бүрийг чанар болгон хувиргах
5. Багшийн боловсрол, хөдөлмөрийг төгөлдөржүүлэх
6. Эцэг, эхчүүдийг бэлтгэх 

Ж.Мөнхзул 2020.01.15

1670